قرية المطاعم الكويتيــــــة

" تحديث "
"القرية موجودة بالقرب من اكوا بارك ومقابل مطعم ميس الغانم "

البارحة يا محفوظين السلامة رحت الى مطعم بقرية في الكويت


قرية وفي الكويت ؟؟؟؟؟؟؟؟؟؟


اي نعم قرية بس شلون قرية وفيها مطاعم وفي الكويت ؟!؟!!!!!





أنا اقولكم المكان وايد حلو صراحة




وفيه 3 مطاعم



المطاعم الثلاثة تتنوع كالتالي أمريكي ، فرنسي وايطالي




كل واحد احلى من الثاني بالديكورات :)




المهم رحت حق اول واحد وهو اشهرهم واسمه trader vic's وهو امريكي ولكن بستايل أفريقي






وللاسف الشديد ماحصلت حجز وقالي انتظر الى الساعة 10:30 قلت له طير يا عمي


شيرجعني بعد ساعتين ( كانت الساعة ثمان ونص)



عاد وانا واقف اسولف مع الشخص اللي استقبلنا في المطعم قالي ترى لحد الحين ما فتحنا رسمي



وبنفتح رسمي على العيد باذن الله ==> ماشاء الله هذا وبدون ما يفتح رسمي مالكم محط ريل عيل اذا فتح شنو بيصير خخخخ ،،، اللهم لا حسد )





المهم وبدون طواله



غيرت اتجاهي وكنت محتار مابين الفرنسي اللي اسمه ( lettre Damour وبين الايطالي اللي اسمه Don Mario's


فقلت لنفسي الايطالي عارفين اكله شلون صاير ليش ما اجرب الفرنسي !!!







وماادري ليش تذكرت الاطباق اللي يسوونها بالافلام واللي تتميز بديزاين الصحن لدرجة انهم ينسون يحطون الاكل فيه خخخخخ ،، ما عدا قطعة وحدة من الشئ اللي طلبته .... لا وأكيييد طايحة بالغلط بعد هههههههه :)





المهم دخلت المطعم وتفاجأت بالديكورات العجيبة والراقية جدا وهدوئه القاتل



بيني وبينكن المكان يوحي بجو رومانسي ==> يصلح للمتزوجين حديثا



زوبدة كلامي ان الديكورات تعبانين عليها عدل


المهم طلبت الأكل


اي نسيت اقول لكم عن الخدمة



خدمتهم حلوة بس اللي يشتغلون ترى قاعدين يتدربون فيكم



وهذي نقطة تُؤخذ عليهم لأن المفروض يختارون ناس محترفين


بس الظاهر انهم استرخصوا اهم عنصر وهو العنصر البشري


مثل ما استرخصوا مواقف السيارات مع ناطحات السحاب




المهـــــــــــــــــم


مثل ما توقعت كان الاكل عينات بس اللي يغفر له ان كان حلو واقدر اعطيه 7.5 من 10


هذا طبقي ( صدر دجاج )







وهذا طبق الجيران ،، ساندويتش سالمون:)









وهذي الثريا والموجودة فوق كل طاولة
ديزاينها وايد حلو ويوحي بالنوم بعد ههههههه
كل قطعة فيها معلقة بروحها عشان تلف وتعطي حركة حلوة
توحي بالهدووووء





سعرهم من طقة اسعار الفنادق تتراوح ما بين 4 الى 6 دنانير ووتتجاوزها في بعض الاصناف




بيني وبينكم كانت تجربة حلوة ، بس الرطوبة شلختنا خاصة ان الموقع عالبحر





يعيب المكان عدم وجود مصلى




سألت رجل الامن بالخارج ( في مكان للصلاة ؟ )



رد علي وقالي ( معرفش ،،، انا اصلي بصلي على قطعة كرتونة ) !!!!



كسر خاطري صراحة ( المرة الياية باخذله سيادة صلاة )




اي صح نسيت اقولكم على اكبر خطأ موجود في موقع المطعم


واتحداكم انكم ما تشوفونه


اكو محول كهرباء في نص المواقف المقابلة للقرية




تعرفون شنو بالنص ،،، بالنص بالسنتر السيارات تلف لف عشان توخر عنه



شوفوا الصورة اللي تحت هذا جيب برادو صافط بموقف ، بس شلون دخل وشلون بيطلع لا تسألوني


لأن الموضوع اكيد فيه رصيف خخخخخخ لأن من الجهتين اكو رصيف ( يمكن الجهة الثانية مو واضح الرصيف)






الصورة الثانية واللي مبين فيها أن الجو نهار ( على فكرة الصور النهارية بشكل عام تم أخذها من موقع المطعم الاصلي ) وتلاحظون على يمين الصورة موقع المحول الاحول خخخخخ الصورة الثانية واللي مبين فيها النهار ( على فكرة الصور النهارية تم أخذها من موقع المطعم الاصلي ) وتلاحظون على يمين الصورة موقع المحول الاحول خخخخخ




ماادري ليش يعطون المجال للساخر ان يسخر


يعني كنت واعد رواد المدونة اني ما اكتب شئ يحر


بس هالمحول بس تشوفونه يحركم مكانه خخخخخخخخخ


ويعطيكم انطباع ان المصمم الخارجي للمواقف ذكي جدا ( الحمد لله والشكر )

ارجع الى محور حديثنا


واقول ان هالمطاعم بيكون لها شأن في الفترة القادمة
وقولوا ساخر ماقال

وخاصة اننا شعب الهبــــــــــات :)



تقبلوا مني اجمل التحايا


ومبارك عليكم الشهر
ساخر كويتي

خبر مسخرة

عـــــــــــــاجل

وزارة الداخلية تتجه إلى طرحها بعد عيد الفطر إثر دراسة أعدتها.. الريع يوجه إلى التوعية المرورية وشراء أطراف صناعية وعربات للمتضررين من حوادث الطرق.. وما يتبقى يحال إلى خزينة الدولة
مزادات.. لبيع أرقام السيارات

كتب عبدالله النجار وعبدالرزاق النجار:بعد عيد الفطر من العام الجاري، تتجه وزارة الداخلية إلى طرح أرقام السيارات الزوجية والفردية والمميزة الخاصة «للبيع في مزادات علنية.. وريعها يوجه جزء منه إلى التوعية المرورية.. والآخر لشراء أطراف صناعية وعربات للعاجزين والمتضررين من حوادث الطرق.. وما يتبقى يحال إلى خزينة الدولة».وأكدت مصادر مسؤولة أن «ما أقرته وزارة الداخلية من خلال قطاع المرور، أن الفائز بأي رقم مميز يحفظ حقه مستقبلا، إذا ما تغيرت اشكال اللوحات... أي من يحصل على الرقم (1) مثلا، وتغيرت أشكال وطريقة الأرقام الحالية.. فإنه سيحصل على الرقم نفسه في الأرقام الجديدة».وتابعت: «فتح الباب لشراء الأرقام، سيختلف حسب الرقم.. فمثلا 20 ألف دينار للأرقام الفردية مثل 1 و2 و3 و4 والكود يكون فرديا أيضا.. و10 آلاف دينار للرقم الفردي والكود المزدوج».وأضافت: «فتح الباب خمسة آلاف للأرقام المكونة من رقمين متشابهين مثل 22 و33 و44 وألف دينار للأرقام الثلاثية والرباعية المتشابهة مثل 111 و2222 وهكذا».
جريدة الوطن تاريخ النشر 30/08/2008

يعني في الامارات عندهم التطوير في الاعمار وكل ما هو فريد ومميز وأأكد انه أمر علينا الاقتداء فيه

بس مو نقلد الامور الغبية

حتى لو كان الريع موجه الى جهات غير ربحية ويحتاجون دعم بس مو الى هالدرجة

يعني بالامارات اللي اشترى الارقام المميزة قبل سنة تقريبا بسعر خيالي قعدنا بالكويت السنة اللي بعدها كلها نضحك عليهم ونقول عنهم فسقانين

الحين احنا صرنا مثلهم

اللهم لا شماته

رب العالمين بيسألنا عن فلوسنا وين صرفناها يا جماعة

انتوا شفتوا المبالغ بس !!!!!!!!!!!!

تحياتي

والنعم في عيال ابل :)

لحد يعلق على عنوان الموضوع وخاصة بمن راح بالهم بعيد هههههه

هالصورة ماادري ملفقة ام حقيقية

بس اذا كانت حقيقية ففعلا مسخرة خخخخخخخخخخ

بس سؤال يفرض نفسه

ما تلاحظون ان مبيعات Apple زايدة في الفترة الاخيرة ؟؟

برامجهم اصبحت تنافس المايكروسوفت

واهم ميزة يتمتعون فيها

ان مـــا عندهم فايروسات ، فـ (أبل) يتمتع بنظام مابيخوريش الميه

فنقدر نسميه Virus free

وازيدكم من الشعر بيت

صار اللي يستعمل لابتوب أبل وخاصة بالكويت يعتبرحاجة ما حصلتش ==> ماني عارف شلون اعبر

واللي يستعمله يعتبر ذكي وواصل مرحلة متقدمة من الحرفنة في الكمبيوتر

بعد سوالفنا احنا يا الكويتيين شعب الهبـــــه

انا لا تكلم بمن يستعمل الجهاز وهو بحاجته وعنده امور فيها استعمال للجرافيكس فيحتاج يستعمله

قاعد اتكلم عن من يتفلس ويتبجح بيحازته هالجهاز وترززه بالقهاوي

واهو حده يطالع مواقع الجرايد اون لاين

اكيد في منكم بيقولي حرية شخصية

وانا اوافقهم الرأي بس ليش الترزز !؟!؟!؟

تحياتي

ناطحات سحاب مدينة الكويت ومواقف السيارات

بكل تأكيد

وبدون أي شك

لاحظتوا نقص المواقف في المناطق الحساسة في البلد

هل حاولتوا تروحون البورصة الساعة 10 صباحا

او البنوك اللي حوالين البورصة

البنك الوطني ،، بنك برقان ،، بنك بوبيان ،، وعبر الشارع البنك التجاري والمركز المالي

أدري أكو مواقف بس اتحداكم تلقون موقف هناك بساعة الذروة الموقف يكفي لمبنى واحد

وعدد الافراد اللي يرغبون بالدخول يحتاج اربع مباني متخصصة بسراديبها لاحتواء هالمنطقة

كل مابنوا برج او مبنى شكبره شعرضه

تلاقون اكو 4 مواقف لأصحاب المبنى وباقي الناس بالزبالة

كنت اكلم واحد من الاهل متخصص في الهندسة المدنية واشكيله الحال

فقالي ان البلدية تجبر كل شخص يبني ان يوفر مواقف تكفي عدد ساكنين المبنى

رديت عليه وقلت له انت من صجك ،،، عيل ليش ثلاث ارباع الابراج والمباني التجارية في الديرة مافيها مواقف سيارات والعالم كلهم يسفطون بالشوارع او بالساحات الترابية اللي حوالين هالمبناني

رد علي وقالي كلامك صحيح

والسبب الكل يعرفه وهو ينقسم لقسمين قسم قبل اقرار القانون الخاص بالمواقف

والقسم الثاني خاص بمرحلة بعد اقرار القانون

قبل تطبيق القانون كانوا لما يسوون مخططات هالمباني العملاقة والكبيرة ،،، يوصلون لمرحلة تحديد التكاليف لكل مرحلة من مراحل البناء و تكلفة عمل مواقف للموظفين والمراجعين تعتبر عالية وغالية مع بعض الامور الاخرى في البرج ،،، ماادري ليش يكون تفكير صاحب المشروع دايما بنفسه ( اهو في احد يفكر بالناس هالايام ، كل من حارث ايده إلوو) مايعرفون شئ اسمه المسؤولية الاجتماعية

فشنو اول شئ يمسحونه من المخطط

المواقــــــــف

والعالم والامة اللي بتسكن هالبرج يقولون لهم باي باي ومع السلامة مالنا شغل فيهم يدبرون نفسهم احنا مو مسؤولين عنهم

أما بعد ما تم وضع القانون اصبح الوضع اكثر فساد ،،،

بتقولون لي ليش وشلون ؟!؟!؟

انا اقول لكم السبب

السبب هو تقديم رشاوي لبعض الموظفين عديمي الذمة والضمير والاحساس

لتمرير موضوع المواقف وامور اخرى يمكن ما نعرفها بعد ( ما ابي احط بذمتي بعد )

بس موضوع الرشوة شئ اكيد

فقلت له وبعدين ؟؟!؟!؟

شنو الحل

ضحك بويهي ضحكة فهمت منه الموضوع على طول وعالطاير

وعرفت ان ما باليد حيلة

الا ان يحل الموضوع من أصحاب القرار

ليمتد الاصلاح لكل طرف من أطراف هذه المشكلة

ومشاكل اكبر منها ايضا

تحياتي للجميع

والله يعيننا في البحث عن المواقف في هالاماكن المهمة

وحتى لا يكون بوستي سلبي

فاني اقدم شكري لبعض الشركات الكبرى التي دائما تصاحب مشاريعها الكبرى والضخمة مواقف سيارات

واخص بالذكر شركة الصالحية ومالكها غازي النفيسي ( اللي يملك مجمع الصالحية العتيد ابو الماركات و مجمع الراية الجميل الهادي )

أحمد الله ان بالقرب من مكان عملي مبنى مواقف
فالشركات التي تدير هذه المباني تطلع ذهب وألماس ولولو بعد
الله يزيدهم ويرزقنا قولوا امين ،،

فلا اعرف سبب عدم دخول شركات اخرى في الاستثمار في موضوع مواقف السيارات لأنها مربحة بشكل خيالي

تقبلوا مني اجمل التحايا

وسلامتكــــــــم م م

مارينا مول وما ادراك ما مارينا مول

تدرون ان المظلة الموجودة في القبة اللي بنص مارينا مول تلف وتغطي الشمس

وتعطي ظلال حسب الوقت

انا توقعت ان هذا هدفها من زمان

بس ماادري ليش عمري ما صادفتها تتحرك

فانهدمت الفكرة في بالي وقلت الظاهر انهم حاطينها ديكور

بس قبل كم يوم شفتها بأم عيني قاعد تلف فقلت اشارككم اكتشافي الخطير

تحياتي

ملاحظة: تلاحظون بالصورة مقر مارينا اف ام عبر الاثير:)

ليش ما احد يظبطنا معاهم لعمل مقابلة مع المدونيين

ترى خوش موضوع لهم

ملاحظة ثانية : عنوان الموضوع شنو كان يوحي لكم ؟؟؟

إذا كان يوحي عن الوضع الاجتماعي الاستعراضي في المول فيرجى تقديم طلب رسمي لي لكتابة هذا الموضوع :)

يقدم الطلب مع الرد على هذا الموضوع

ملاحظة ثالثة: ذاك اليوم اطل من دريشة البيت والا ذيج القطوة اللي توها والدة وقاعدة تسقي عيالها حليبة العصر

على فكرة عملية ولادتها تمت في مستشفى رويال حياة خخخخ لزوم الرزة بفريج العتاوية :)

تحياتي تربيع

Gourmet Burger Kitchen _ GBK

تدرون وين هالصور ؟؟؟؟





مااعتقد ان الموضوع لغز !!!




هالصورة في مارينا مول بالقرب من محل game wizzzz يعني لو لاف شوية يسار كان لقيتوا معاي قهوة سكند كب





المهم




هالمطعم اكتشفت انهم سكروه ....... ولكن في مارينا مول فقط




هو اصلا مو مطعم واحد هو 4 مطاعم في مكان واحد





يمكن دخلته مرتين او 3 مرات ،،، وكل مرة ادخله يكون افضى من المرة اللي قبلها



وان كان في ناس .... يكونون ناس ذوي الشخصيات الغريبة والمشبوهين اجتماعيا ( ماابي اوضح اكثر )





في محل منهم متخصص همبورجر ومتواجد حاليا في الافينيوز واسمه (مطبخ جورميه برجر) شرايكم بالترجمة :) واختصاره gbk بتلاقون شعاره موجود في الصور ( فوق أو تحت :) )









وقد قام الاخ مـــارك بتقييم البرجر في هالمحل من ضمن تقاييمه وتحديه مابين مطاعم البرجرز
المتواجدة بالكويت واختيار أيهم الأفضل ؟





من وجهة نظري الشخصية فقد ابخس حقه في التقييم .... وخفس فيه صراحة
مع اني اوافقه على مجموعة كبيرة من تقاييمه وذوقه بالمطاعم ( حتى لحد يقولي اختلاف في اللايف ستايل والذوق )
الفرق بسيط يا جماعة :)


انا من يوم ما دخلته وانا مطيح فيه
صراحة عنده ساندويتش من ضمن المنيو اسمها Garlic Mayo انا اكلتها مرة وحدة وتنحت صراحة
انصحكم وبقوة تجربونها

زبدة حديثي أن هالمطعم يستاهل ياخذ حقه من الدعاية
لأن صراحة وبالنسبة لي لا يقارن مع مطاعم اخرى دايما يكون عليها ( طق اعصي ) ولاهي بالعين شئ
واكلها عادي .... لن اذكر اسماء حتى لحد يضغطني ويكون مطعمه المفضل خخخخخخ


عموما جربوه وعطوني رايكم يا شبــــــــاب

تحياتي ،،،

حلاق

ماادري شفيه حلاقي

كل ما اروح له يقولي شرايك اسويلك تنظيف بشرة

ذبحني

وانا اعتذر منه ... بس الاخ يحن بطريقة بايخة المشكلة اخاف أعطيه كلمتين بالعظم

واعصب عليه فيخوره واهوا يقص شعري خخخخخخخخخ

الظاهر ان صاحب المحل معطيهم target والاخ دايما مو قادر يحققه

واحنا بالنهاية ناكلها يا الزباين

بيني وبينكم اول مرة اتعرف عليه احرجني لدرجة اني قلتله يالله توكل على الله

اعملي تنظيف بشرة ..... طبعا لاعت شبدي وحرقلي ويهي من الفراك خخخخخخخخخ (خو احنا يا الرياييل مافينا صبر حق هالسوالف مو مثل الجنس اللطيف :) )

ومن يومها دايما أدقره بطريقة مهذبة ( مرة مستعيل ،،، مرة عندي موعد،،، مرة بلحق على الصلاة ،،، مرة اقوله المرة الياية .... وهلم جرة )

اذا عندكم قصص مع الصالون اللي تحلقون عنده

شاركونا فيها

تحياتي

.

تساؤلات بلوقية

سؤال فني يا جماعة الخير

شلون

كيف

انزل اي شئ من اليوتيوب على المدونة؟؟؟

السؤال الثاني

اذا كنت بنزل استبيان او بضيف اي شئ على المدونة

عادة اذا رحت الى خانة التخصيص واخترت إضافة أداة

تشتغل معاي عادي

بس هاليومين ماادري شالسالفة ؟!؟!؟!؟

تطلعلي صفحة مليانة علامات استفهام ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ماادري شالسالفة

حاولت اضيف ساعة بالموقع مو ظابطة معاي

حاولت اضيف شغلات يمين يسار ايضا مو ضابطة معاي

فيرجى لمن يجد بنفسه القدرة على حل مشكلتي الفنية

يطقطق اصابعه ويساعدني

شكرا جزيلا لمن يعرف ولمن لا يعرف

تحياتي

رمضان قرب يا ناس

شعور جميل

شعور رائع

شهر رمضان قرب يا ناس

هالشهر الفضيل احبه من الله الى الله

الجو الاجتماعي فيه جميل جدا

التراويح ورغبة الجميع في الحصول على الحسنات في شهر الحسنات فيه تتضاعف

الحرم المكي

(الجيام ==> القيام) في فترات متأخرة من الليل طلبا الرحمة من رب العباد

الفيمتو الهريس اليريش السمبوسة ووووو

وللاسف ما قد رحت الى مكة المكرمة في رمضان

فاعوض متابعتي لها عبر شاشات التلفزيون ،،،، فبدأت متابعة التراويح في الحرم المكي

من اول ايام الشيخ عبدالرحمن السديس والشيخ سعود الشريم

ماشاء الله عليهم كانوا مستلمين التراويح والقيام بروحهم

ترى مجهود جبار يحتاج رباطة جأش وتحمل

وذكاء وقدرة على حفظ كتاب الله كامـــــلا

ومن بعدهم ما لفت نظري من مقرئين للحرم المكي

الا الشيخ ماهر المعيقلي وكان هذا في رمضان الماضي

ماشاء الله عليه قرائته رائعة وهادية جعلتني أزيد خشوعا بكلام الله تعالى

فبودي الآن وضع احب المقرئين الى قلبي
من المسجد الحرام وخارجه وهم كالتالي :

• عبدالرحمن السديس


• سعود الشريم


• صلاح أبوخاطر


• سعد الغامدي


• أحمد العجمي


• علي جابر


• ماهر المعيقلي

ولسماع هالمقرئين الرائعين ،، انصحكم بالدخول على هذا الموقع

بالنسبة الى مشاري العفاسي فأحس ان معطينه اكبر من حجمه

قرائته حلوة واحبها ولكنه ليس كالعمالقة الذين ذكرتهم مسبقا

عموما أحببت أن اجعلكم تعيشون معي بجو رمضان قبل رمضان

ومشاركتكم بأفضل المقرئين بالنسبة لي لتستمتعوا وتكسبوا الاجر بسماع تلاوتهم في الشهر الفضيل

تحياتي ....

سوق المصارف

تدرون ان بالكويت عندنا سوق اسمه سوق المصارف ؟؟!!!

تدرون وين مكانه ؟؟؟؟

تدرون شنو يبيعون بهالسوق ؟ّ؟ّ؟؟؟ّ؟ّ

بتقولون اكيد مثل سوق الصراريف ،، يصرفون فلوس

وانا اقول إن جوابكم خطـــــأ

فالجواب اليقين عند جهينة

وانا اليوم بصير جهينة ==> تدرون ان جهينة رجل وليس امرأة ==> معلومة الكثير يجهلها

سوق المصارف يعتبر حاليا هو سوق المهارة

إذا تبون تشترون ساري حق هنديتكم ،، بتلاقونه موجود هناك

مثل خرابيط سوق اليمعة بتلاقونها ايضا موجودة هناك

السؤال اللي يطرح ويبطح نفسه الحين

شلون قلب هالسوق من سوق مليان فلوس الى سوق مليان خام ؟؟؟؟؟؟؟؟؟؟؟؟؟؟؟؟؟؟

ملاحظة : لما كنت ااخذ الصورة الموجودة اعلاه كان هاليمني اللي بالصورة على باله اني مباحث حخخخخخخخخخ

فخزني خخخخز زين ما حذفني بالقات مالهم :)

تحياتي ماي فريندز

منشطـــــــــات رامي

مصدر الخبــــــــــــر وللاختصار فالخبر يقول :

جرد الرامي الكوري كيم جونغ-سو من الميداليتين اللتين أحرزهما في مسابقة الرماية ضمن اولمبياد بكين 2008 بعد ثبوت تناوله المنشطات.
وكانت المتحدثة باسم اللجنة الاولمبية الدولية جيزيل ديفيس أكدت الجمعة أن جونغ-سو الفائز بفضية المسدس من مسافة 50 م وبرونزية من 10 أمتار، قد تناول مادة "بيتا بلوكر" المحظورة حسب ما اثبت فحص المنشطات الذي خضع له.
وأضافت ديفيس: "نتيجة لذلك (تناوله المنشطات) تم استبعاده عن الألعاب وإلغاء النتيجتين اللتين حققهما في مسابقتي 10 أمتار و50 م. سيتم تجريده من الميداليتين ومن بطاقته الاولمبية".

أقوى سؤال في الموضوع :

الرياضي ليش ياخذ منشطات ؟؟؟؟؟؟؟؟

مو عشان تعطيه قوة اضافية !!! هذا تعريف المنشطات

الشاب اللطيف شكو ماخذ منشطات ؟!؟!؟

ناوي يسابق الرصاصة اللي يطلقها من مسدسه خخخخخخخ

هالتساؤل خطر في بالي اول ما سمعت الخبر

ولكن بعد التأكد من معطيات الموضوع ==> حلوة معطيات

اليكم التحليل المنطقي:

ان اي لعبة محتاجة قوة تحكم بالاعصاب وزيادة طاقة وزيادة القدرة على التحمل

والمنشط يعطي الرماة ما يطلبونه من ناحية الاعصاب والتحكم فيها

ومن ناحية ثانية يخليهم يهرهرون وتصير فيهم الفعايل بالمستقبل

بس الظاهر انهم يقولون ناخذ الذهب الحين وندبر نفسنا بفلوس المكافأة بعدين

أشوى انهم صادوهم عشان يتوبون من الغش بهالمسابقات العالمية

تقبلوا مني اجمل التحايا

.

تشترون خط تلفون بـــ 650 ألف د.ك

أدري انكم مجذبين عنوان الموضوع

وتقولون هذا بيألف لنا قصة خيالية عن خط تلفون

بسعر 650 ألف دينار !!!!!

مصدقيني والا لأ

معاذ اشوفك تضحك انت ودوكاتي على السعر
why me تحشين فيني مع استكانة وشمحوطة
خالد لا تخش ويهك عني انت وعبادي

هيييين

وعشان ارفع عني وعنكم الاحراج

اليكم بالدليل الدامغ

وتفاديا لأي اخطاء بكتابة الرقم

اتصلت انا وواحد من الشباب على الارقام المذكورة بالاعلان

(المدفوع سعره والكبير بحجمه )

المفاجأة ان الرقم صحيح

والريال شاد حيله ويحاول يقنعنا ان الرقم مميز

قلتله الرقم مميز اذا عايشين بامريكا ،، لأن بالكويت محد يستعمل الاحرف مع الارقام

بس الريال مصمم

قلناله الله يعينك على بيع الرقم لأن رقمك ضرب من الخيال

وسكرنا التلفون وكل واحد فينا ماسك ضحكته على هالانسان الموصاحي

والموصاحي اكثر من سوف يشتريه منه بأي سعر كان

لأن حتى لو بلاش الرقم ماهو مميز خخخخخخخخخ

تقبلوا مني اجمل التحايا

ســـــاخر كويتي

هندي لصقـــــــــــة

بما اني من محبين الجنسية الهندية ومتعقد منهم في كل مجالات الحياة

مرني هندي بالدوام لابس عمامة من غير احم ولا دستور

رفس الباب ودخل ==> الباب كان مفتوح بس عشان الحبكة الدرامية

يحاول يعرض علي بضاعته المكونة من ( بتاع كلووو) كل شئ يخطر ببالكم عنده خخخخخخخ

بيني وبينكم في عنده شغلات حلوة بس low quality

المهم عجبني شئ واحد وشريته منه

فاستانس علي وكل اسبوع مدرعم علي يعرض علي ما يستجد من بضاعة عنده

المهم

لاعت جبدي منه

عطيته رقم المكتب وقلت له اذا في شئ جديد اتصل علي

بس الرجال مو مقتنع ،،، ومستمر بالحضور

والمطامر جدامي

برايكم شلون اطفشه ؟؟؟؟

المشكلة ان الرجال طيب صعبة اطرده ،، وعاملي فيها مسكين

وبنفس الوقت بتاع كلووووووووو وعنده كل شئ ههههههههه

وبما اننا قاعدين نحش بالهنود

هذي نصايح قدمها حكيم هندي لواحد كويتي

ان شاء الله تفيدكم هالحكم ،،،

1) الله معلوم كل شي عن نفر .... بس انتا مافي معلوم كل شي عن نفر !!

2) لو انتا يمشي في ليل يطلع عليك قطو اسود بعدين كلام مياااااوو . وانتا خوف ... كلام بسم الله الرحمن الرحيم .. بعدين خوف يروح !!

3) الله يعطي انتا فلوس كثير .. لازم شكر الله ... انتا مافي شكر الله .. بعدين انتا ينام يقوم مافي حصل فلوس !!

4) انتا يبغا ياكل تفاح !! لازم ياكل يد يمين !!

5) أي نفر يشوف ناس من طرف خشم مال هوا ... ربي يعاقب هوا ... علشان كلو بني ااادم من تراب سيم سيم

6) انتا انسان في مخ لازم يعبد الله ... مخ خراب خلي ولي يعبد بقرة !!

7) حرمه مخ خراب ... دايم يمسك تلفون قرقر مع صديقه هوا .. مافي ينتبه بيت ... مافي ينتبه يهال... رجال مال هوا ... طلاق زواج حرمه ثاني اكوس من هيا !!

8) علم سوي نور كويس .... جهل خلي انتا مافي شوف شي كلو اسود !!

9) مافي خلي كلو شغل بكره ... لازم خلص شغل اليوم علشان انتا يرتاح ..

10) لو انتا ياكل شي طعم هوا مافي كويس ... مافي كلام عع .... هذا نعمه >بعدين ربي يعاقب انتا !

11) كلو بني ادم سوي خطا ... بس نفر كويس مافي سوي هذا خطا مره ثانيه

12) انتا مسلم .... انتا نفر ميه ميه .... بس لازم اسلام انتا يكون ميه ميه ...!! )

13) انتا يلبس دلاقات لازم غير دلاقات علشان ريحه مافي كويس

تحياتي

هاتشووووووووووو

صباح الخير عليكم جميعا

بدش بموضوعي مباشرة

فيني وسوسة من اي شخص يعطــــس جدامي وما يغطى حلجه

اتنرفز يرتفع ضغطي ودي اروح ادوس في بطنه

شنو السبب برأيكم ؟!؟!؟!؟!؟

انا اقول لكم

قبل فترة قريت دراسة نشرتها وكالة رويترز مذكور فيها بأن مع كل عطسة يعطسها الانسان تخرج كميات كبية من البكتيريا (المكورة العنقودية) ==> لايكون قنبلة بس

تنتشر في الجو وقد تسبب مرضا يصيب الشخص المتلقي لهذه البكتيريا

الله يحفظكم ويحفظ حبايبكم امين

لهذا السبب انا متعقد من كل شخص يعطس بالهواء بدون ما يغطي عطسته

والادهى والامر ان يعطس في مكان مغلق ،، عععخهثعصقخحهصثغقخهعغصثهعقغص ==> يعني متنرفز :)

مع ان من السُنة أن يغطي العاطس فمه وأنفه أثناء العطس
فقد نقل عن رسول الله محمد عليه الصلاة والسلام إنه كان إذا عطس غطى وجهه بيده أو بثوبه
ومن السنة أيضا أن يحمد العاطس الله

وعلى من يسمعه أن يدعو للعاطس بقوله يرحمكم الله ويرد عليه العاطس يهديكم الله ويصلح بالكم

الاهل دايما يضحكون علي اذا شافوا احد عطس جدامي

يحبون يشوفون ردة فعلي خخخخ( اااااااه منكم يا الشماتة)، على بالهم ان معلومة نقل المكروبات غير صحيحة

العبرة بمن يضحك اخيرا

دعاية حلوة من شركة كلينكس المشهورة
تثبت وجهة نظري اكثر واكثر

تقبلوا مني اجمل التحايا

صيد من كاميرة تلفوني

موضوعي اليوم هو صورة وتعليق سريع

اول شئ كنت ماشي في امانة الله في احد شوارع الكويت ( اكيد بالكويت عيل بجنوب افريقيا )

فلفتت نظري شاحنة تمشي يمي بالشارع وكانت الصورة اللي حاطينها عليها حلوة وايد،،،، اليكم بالصورة

ففيها فكرة ذكية





انتقل الى الصورة الثانية
وهي صورة بوستر كان محطوط في وزارة الشئون في مجمع بهبهاني ( وللعلم فان هذا المكان مليان وافدين وبشكل موطبيعي لأن عندهم يتم عمل الاقامات للموظفين الغير كويتيين في شركاتنا شوفوا الشياطين شنو مسويين بالصورة
لااحظوا ان المكتوب في البوستر ( افتخر اني ما ادخن )

والشباب الحلوين شنو مسويين

ماسحين حرفين من الجملة فاصبحت كالتالي ( افتخر اني ادخن ) ههههههههههه صج لوتية





انتقل الى الصورة الثالثة

من القناة الثالثة الرياضية في تلفزيون الكويت

ماراح اعلق عليها

واترك لكم التعليق خخخخخخخخخ










قبل شهرين كنت في دبي


كنت في الفوود كورت مال مول الامارات


ولفت نظري مطعم اسمه مطعم نواب ههههههههههه


ماادري ليش تذكرت نوابنا الافاضل


وقلت بقلبي ان نوابنا حدهم يشتغلون في مطعم


احسن لهم من مجلس الامة


على الاقل عندهم هدف واضح وهو عمل اكل للزبون والسعي لرضاه


اي هين هههههههههه











والى مجموعة اخرى من صور موبايلي


تقبلوا تحيات اسرة العمل وهي انا بروحي هههههههه





.

المسجد وانا في رمضان ........ الجزء الاول

بما ان رمضان قرب

واحنا في شهر شعبان وبالمناسبة فشهر شعبان يغفل عنه المسلمون لأن الرسول صلى الله عليه وسلم

كان يصوم اغلب ايام هالشهر فحبيت اذكركم واذكر نفسي بفضل هذه الشهور الكريمة

انتقل الى موضوعي وهو أخطاء بعض المصلين ( ولاعيب في الخطأ إن تعلم الانسان منه مهما كان عمره)

في بعض الناس الله يهديهم مااكتشفوا المساجد الا في شهر رمضان فعندما نذهب الى المسجد في اول ايام الشهر نرى ونستبشر بالتزامها وحضورهم خلال الشهر الكريم

ولكن للاسف الشديد ما أن يمضي اسبوع من الشهر حتى تتلاشى هذه الوجوه شيئا فشيئا

فنجد انفسنا عدنا لمرحلة البداية

أرغب في التركيز على اخطاء بعض المصلين وهي تكون غالبيتها من الزوار حديثي العهد في المساجد

واكرر مرة ثانية بانه لا عيب في التعلم من هذه الاخطاء فبالنهاية كلنا نرغب في الصلاة كما يحب رب العالمين و رسول الله محمد صلى الله عليه وسلم

مثل ما تلاحظون بالصورة اللي تحت

وعندما يبدا سطر جديد بالصلاة بعض الناس تلاقيهم مستلمين أقصى يمين المسجد

ولكن المفروض ان يتوسط خلف امام المسجد

في شباب ايضا ما يحلاله الا وقت الصلاة في التشييك على نفسه

وتنظيف نفسه من بعض بقايا خام على ملابسه او بعض البقع المرق ( بعد ما يكون تغدا مجبوس دجاج وتلاقونه مكثر الدقوس حبيتين ههههههه )

هذي الحالة صادفتني اكثر من مرة خاصة من الصغار بالسن او المراهقين

وهي عدم ثبات اطراف السجود على الارض وتلاقون ريوله بصوب

وايده مسكرها تقولون عنده مباراة ملاكمة بعد الصلاة

أو يحط اطراف اصابعه على الارض وكانه يستعد لركض سباق 200 متر سرعة خخخخخخ

والصحيح وضعها كاملة على الارض وجميع الاصابع باتجاه القبلة وكذلك القدمين واصابعها

انتقل معاكم الى وضعية الركوع

صراحة يرفعون ضغطي اللي ما يضبطون الركوع

يعني المفروض الواحد يكون زاوية قائمة لمن يقدر طبعا واستثني من لايستطيع بسبب مرض في ظهره

تلاقون الكل راكع بنفس المستوى وطامر لنا واحد مو راكع عدل

اذكر مرة واحد شايب مايقدر يركع ماخذ ولده معاه المسجد

وولده قدوته ابوه بكل تاكيد

تلاقون الاب يركع ركوع على قدر استطاعته

والشاب اللطيف ولده مسوي نفس الشي فاذا شفتوه اتحداكم تقولون هذا راكع

بتقولون قاعد يطق رقبته عرج .....

انتقل الى الموبايلات

وخاصة اللي يخلي الرنة تقرقع طول وقت الصلاة

خايف يتحرك تبطل عليه الصلاة

مايدري المسكين ان ذنب اذية كل المصلين اللي معاه برقبته

حطه سايلنت وفكنا من القصة او لا تدخله المسجد وبس

اترك البقية في الجزء الثاني

واشوفكم على خير

تحياتي

كاريكاتيرات تعكس الواقع فعلا
أشكر موقع عمرو خالد على الفوائد الكبيرة اللي يقدمها للجميع

معاملة خدامة ....... وبس

الاسبوع الماضي كان اسبوع حافل بالمراجعات الحكومية

وكله علشان خاطر عيون خدامة طالبينها من مكتب خدم

سمعو معاي السالفة :

اول شئ طلبت الخدامة من المكتب

بعدين رحت برج التحرير حتى اخلص المعاملة

اخذت رقم وكان رقمي مميز وهو رقم 99 ==> عقدة الارقام المميزة لاحقتنا صج كويتي هههههه

بس لاهو مميز ولا هو طل بعيني

قعدت ســـــاعة بحالها انتظر ولما وصل دوري

طحت عند موظفة من بتوع العدسات الملونة والمكياج الكامل والحواجب اليابانية ( لو ليلة عرسها ما اكشخت جذيه ) قالت لي سوي طلب عند الطباعين

بس كنت ذكي ( اسم الله علي ) وقلت لها الطلب جاهز ومسويه

باغتتني بطلب ثاني وقالت لي حط طوابع اخخخخ شلون طافتني هذي

رحت شريت طوابع ورجعت لها

قالتلي لازم صاحب العلاقة يكون موجود وهو اخوي الكبير( كان مسافر )

طيب يمين يسار حلولي هالمشكلة الريال مسافر

قالوللي روح حق الضابط هناك يحل لك المشكلة

رحت للضابط وطلع ولد حلال وقالي اذا عندك بطاقته الاصلية نمشيلك المعاملة

ولله الحمد كانت بطاقته الاصلية معاي

لحد الحين كل شئ ماشئ اوكي

رجعلت حق الموظفة اليابانية وقلت لها مديركم وافق على استثنائي

قالتلي اوكي عطني المعاملة ,,,, وفي هذه الاثناء كانت الشابة اللطيفة متميزة في طريقة كلامها

يعني من غير اي لف ودوران كانت حليمة بولند مثالها الاعلى ( مالت على المثال الاعلى اللي ما يسوى يكون حتى مثال ادنى )

المهــــــــــــــــــــــــم

انهيت المعاملة بعد مطاردات يمين ويسار ومن الساعة 4 الى الساعة 6 مساءا الى ان انتهت المعاملة

واخذتها على طول الى مكتب الخدم لطلب الخدامة

وفجأة

وبعد يومين

دقوا علي مكتب الخدم وقالولي ان في خطوة اضافية جديدة اضافوها بقانون جديد الفترة الحالية

وهي ان علي ان اذهب الى وزارة الخارجية للتصديق على إذن العمل

لاحول ولاقوة الا بالله

وهني بدأت القصة

انتهيت من الدوام وطرت على برج التحرير وكانت الساعة 3:30

===> كنت اكلم نفسي واقول شحقه رايح مبجر ليش ما أتغدى وبعدين اروح

بس قلت لالالالا

خليني افتك واخلص شغلي مبجر

دخلنا برج التحرير وسألت رجل الامن اللي على اليمين

عندي معاملة في وزارة الخارجية ، وين وزارة الخارجية في مبناكم المصون

قالي في البداية تروح لوزارة العدل في الدور الاول ومن بعدها الخارجية في الدور الثاني

==> بيني وبين نفسي شهالعذاب ( مكتب خدم ، هجرة ، عدل ، خارجية )

رحت الدور الاول والا ذاك الباب الخشب اللي شكبره وكأنه مدخل قصر من قصور اوروبا

ونناطرين عالباب نص اهل الكويت

والا ذاك الكويتي اللي متطوع جزاه الله خيرا ان يسجل اسماء الحضور واحد واحد

حتى يسهل عملية الدخول وقت فتح الباب

صارت الساعة اربع وفتحوا الاخوة الباب ............ افتح يا سمسم

سلمناهم الورقة ( اللي ذبلت من كثر الكتابة عليها )

قالولنا انسوا الورقة وتعالوا اخذو ارقام ثانية من داخل

طيب واللي ناطرين من الساعة 2 ( تصدقون ان في ناس من الساعة 2 ينطرون ،، وفي الفترة الصباحية في ناس من الساعة 5 الفجر ينطرون .؟؟؟؟؟.... شدعوة !!!! )

المهــــــــــــــم

قعدوا الجماعة نص ساعة يفهمون اللوح اللي واقف عند الباب اننا نظمنا نفسنا وراضين على الترتيب الأول

والاخ متنح وراكب راسه ان الشغل لازم يمشي مثل ما تعود كل يوم

مساكين ماعندهم القدرة على التفكير ،،، تدرون جهة حكومية ولازم العقم بالتعامل

وصار دز مدازز شئ موطبيعي

شياب يدزون شباب يدزون

حريم يتداززون

كان يومها يوم الدز المحترم

واللي تطيح غترته واللي عقاله طار ،، واللي واللي واللي ياااااااااااااو

ما سوت علينا هالخدامة

ذكروني بأيام المتوسطة والثانوية لما كنا نصف دور بالمقصف وندازز بعض عشان اللي يوصل قبل بشتري ذيج الصمونة المفغصة ، اللي استغفر الله مافيها ريحة الاكل

المهم ،،، اللي وصل اخر واحد ودرعم عند الباب دش داخل وصار رقمه واحد

واللي مسجل رقمه بالورقة الخايسة (سبب المصايب) وقاعد من الساعة 2 صار رقمه 85 ععععععععععع

فعلا شئ يرفع الضغط

وقعدنا ننتظر من الساعة 4 وما وصل دوري الى الساعة 7

تخيلوا ................... وكل هذا عشان خدامة

ولما وصل دوري قالي وين صاحب العلاقة

قلت له مسافر

قالي يجب الحضور شخصيا ......... NEXT

لحظة يا الطيب هدي بالك وافهم السالفة مني

يمين شمال ماكو فايدة

(الجماعة يذكروني بالحصن اللي يحطون لهم شئ على عيونهم عشان يمشون في اتجاه واحد فقط)

ابد راكب مخه بحضور صاحب العلاقة شخصيا

وكل فترة الانتظار راحت فافوش

ورجعت الى البيت بخفى حنين

ولاحول ولاقوة الابالله

ان لله وان اليه راجعون

آآل يبون يسوون الكويت مركز اقتصادي وعمل حكومة الكترونية آآل

هذا ويهي اذا صارت اقتصادية او الكترونية

ان ما رجعنا الى عصر الديناصورات مااكون ساخر كويتي

تحياتي