كافييـــــن

القهوة بأشكالها

نسكافيه ،،، كاباتشينو ،،، موكا وربعها (البيضا والسمرا) :) ،،، اسبريسو ،،، كوفي ميت ... الخ

الشاي واشكاله

الاحمر العادي ،،، الأخضر ،،، الابيض ==> طالع طلعة هاليومين يقولون وايد مفيد

كل ما تم ذكره أعلاه منشطات وفيها كمية من الكافيين تكون متركزة في القهوة وتكاد تكون معدومة في الشاي الابيض

ولكن موضوعي اليوم هو عن ادماننا للقهوة والشاي

يعني اخواننا المصريين يدردعون بالشاي (يعني يشربون بكثرة) 24 ساعة ( على الفطور ،، قبل الغداء ، بعد الغداء ، مع سناك العصر ،، بعد السناك ،، قبل العشاء وبعد العشاء وبنص الليل مع الشيشة خخخخخ )

الاخوة في بلاد الشام ( لبنان ، سوريا ، فلسطين ، الاردن ) أيضا يدردعون القهوة على الريج قبل ما يفرشون اسنانهم

وايضا في كل الاوقات النهار والليل

بيني وبينكم الموضوع لا يقتصر على جنسية معينة ولكنه منتشر بشكل كبير

في ناس مظبطين نفسهم في شرب القهوة منزوعة الكافيين للسيطرة على انفسهم

وفي ناس مسيطرين على الوضع في شرب القهوة والشاي في اي وقت كان دون ادمان

بمعنى انهم متحكمين بنفسهم يقدرون يشربون مرة بالشهر أو بالشهرين مرة .... وهلم جرة

بس اللي يرفع ضغطي من لا يستطيع التأقلم دون شرب القهوة او الشاي واذا لم يشربها

تعكر يومه ومزاجه خلال اليوم كله

تدخل وزارة والا ذاك الموظف بونفس خايسة ما يرد على احد

اذا تبي تكلمه كلم مديره عشان يرد عليك :)

بعض الموظفات لازم تترس بانزين ( ريوق ،قهوة ،شاي ) بعدين تبدي تشتغل

ولما يخلص البانزين تروح بيتها على طول مالها شغل في أوقات الدوام الرسمية

( عاد انتوا وحظكم تارسة خصوصي والا ممتاز ... )

وهناك إدمان اخر عند بنات الكويت ==> ودي اضغطهم شوي

وهو ادمان المكياج

يعني بالدول الاجنبية بناتهم ما يحطون مكياج وان حطو المكياج حطوه خفيف ( شوية كحل على شوية كريم اساس وكان الله غفورا رحيما) ==> شرايكم فيني خبير صح :)

وحتى في مناسباتهم الكبيرة يحطون مكياج عدل ولكن ليس بقوة مكياج بناتنا ==> اسميها ضوضاء بصرية

فبناتنا إذا بيطلعون من البيت وحتى اذا رايحين فرع الجمعية قطعة 3 عند محول الكهرباء تحط مكياج اللهم ياكافي تحط مكياج عرس خخخخخ

فحنان دشتي وأخواتها وربعها ايضا ... من اصحاب محلات المكياج خربوا اشكال وملامح بناتنا ( الله يسامحهم بس )

بس الشرهة مو عليهم ... الشرهة على بناتنا اللي مثل الخرفان واللي إن صارت هبًه او موضه في اي موضوع نلاقيهم

تارسين السوق ومكسبين هالمحال

(احساسي يقول ان اصحاب المحلات هم اصحاب الهبات حتى يكون عندهم زباين كل حزة وساع )

وحتى لا يزعلون مني بنات حواء فهناك مكياج حلو وناعم ويخلي البنت حلوة بس هؤلاء ينعدون على الاصابع

من وجهة نظري المتواضعة فان كثرة المكياج ووضعه في كل وقت وزمان هوضعف في الثقة بالنفس لدى بنات حواء فالرغبة في اخفاء العيوب (إن وجدت) هو امر مقبول ولكن إذا صار الموضوع هوس كما هو الحال لدينا حاليا

فيعتبر مرض وعدم ثقة بالنفس

فالله يعيننا ويفكنا من شر كل انواع الادمان قولوا امين


تحياتي ،،،،