كل ما اروح السينما
اكتسب معلومة جديدة عن الشعب الكويتي
وبالاصح اذا تبون تعرفون طباع اي شعب تزورونه ، انصحكم بالذهاب الى سينماتهم
في اوروبا السينمات حدها صخة وكل واحد متعبطله وحدة يتساسرون كأنهم طيور حب خخخخ
في الكويت مصبنة في الليل ، يهال في العصريات ، عوايل في الويك اند
بس مصبنة الحين يعتبرون راقيين وايد عن مصبنة قبل ايام الليت الاحمر ،، والتعليقات بصوت عالي جدا وبكل اوقات الفيلم
والسوالف والضحك بنص الفيلم ( ربعنا تحضروا مع الوقت)
بس اللي بتكلم عنه اليوم هو الزبالة اللي يخلفها شبابنا وبناتنا بعد كل فيلم
انصحكم تجربون تجربة وهي الحجز بالكراسي الاخيرة في السينما وبعد انتهاء الفيلم لا تطلعون
ولما تفضى القاعة تحركوا الى الباب وشوفوا هوايل شعبنا الكريم من قاذورات ووصاخة كل سطرة من اسطر السينما
كل انواع الاكل بتلاقونها على الارض السائل على الكرنشي على البوبكورن
ماادري شلون يستحملون يطالعون الفيلم وتحتهم هالزبالة
يعني بالله عليكم ...... الاسلام ما يحثنا على النظافة ؟؟؟؟ وتعتبر من الايمان ايضا !!!!
شلون ترضون لنفسكم ولعائلتكم بهذه القذارة انها تكون تحتكم
استثني من كلامي اي شئ يحصل بالخطأ ، لأن الخطأ وارد بكل الاحوال
فتكفووون عطوا انطباع حلو من الكويتيين الى الكويتيين منها اجر وتطبيق لسنة حبيبنا محمد صلى الله عليه وسلم ومنها يعكس مدى تحضرنا ,, ومو لازم نعطي الانطباع للاجانب كثر ما نعطي الانطباع لنفسنا ونلوع جبد بعض بالكويت
دعونا نعمل وقفة
ونقول النظافة من الايمان ==> احس روحي صرت مثل بيت القرين :)
تحياتي ،،،،
هناك ١٠ تعليقات:
هذي مشكلة فعلا لكنها مشكلة من الصف الثاني كون انه تاثيرها ما يمسك شخصيا أثناء مشاهدة الفيلم بالإضافه لعلاجلها السريع من قبل العاملين بعد إنتهاء الفيلم .
المشكلة الحقيقية هي الناس الي داخله الفيلم علشان يدخلون سينما فقط , مو علشان يشوفون فيلم , لأنهم و للأسف في الواقع ما عندهم مكان ثاني يطلعون له و يزورونه بالعطل ( في الكويت ) , فإحنا يالمتابعين و المتحمسين للفيلم ناكلها أخر شي من ازعاجهم و تنكيتهم الماصخ اثناء المشاهدة .
نصيحتي لك ولكل واحد يفكر يدش فلم عربي بأول ايام العرض وخصوصا إذا كان الفلم كوميدي ، لاتدشون
قرادة حظي دشيت اول عرض حق كتكوت وبغيت اتهاوش مليون مره من الطنازه والضحك بصوت عالي الي ماله داعي ولا التعليقات الي الواحد يستحي يسمعها واهله معاه :/
سالفه النظافه معاك حق بس اعتقد السينما عارفه ان الناس ماراح تشيل إلا عمرها لما تطلع علشان جذي بعد كل عرض يدشون ينظفون وراهم لوووول هذا الي اعرفه :)
اتفق معاك ان العاملين ينظفون بسرعة
وينظفون اسرع من موظفين الامارات في دبي ( توني رانج من هناك )
سينيماتنا انظف بوايد منهم
بس القمندة ومثل ما تفضلت بالناس
الغلط اللي يدشون
ما اقول غير الله يهديهم
ويلهون في اماكن غير السينمات :)
تحياتي
هلا اخوي معاذ
بالنسبة الى الافلام العربية
انصحك تروح بعد ما يبرد الفيلم
وقبل لا يشيلونه من السينمات
اما اذا رحت بوقت الذروة بانصحك تروح فترات الساعة اربع تقريبا
يكون الجو رايق شوي
قعدت اتخيلك وانت فاقد اعصابك بالسينما هههههه
الحل انك تضحك عليهم وتقول الله يشفيهم خخخخ
شكرا لحضورك الكريم
والله كل واحد يعبر عن البيئه الي عايش فيها بإختصار
بس شغله تقهر يا خوي انا معاك :)
people talking children crying silly comments and the SMELL OF NACHOS
مثل ما تفضلت اخوي دوكاتي
هي تعكس البيئة ولأنها منتشرة بشكل كبير في الكويت
فهي تعكس وللاسف الشديد بيئة اهل الكويت
يعني اذا حضر شخص من برة الكويت
فانطباعه بيكون لما يشوف هالهوايل
انطباع سلبي جدا
فالله يعيننا
شكرا لمرورك الكريم
Organic Kuwait
شكرا لحضورك
وصدقت في نقطة الناتشوز
يعني اذا رحت السينما بالدشداشة فاني اتبخر ناتشوز كمبودي خخخخخ
يعلق بالدشداشة 3 ايام :)
ازيدك من الشعر بيت
لما يشترون نفيش الهندي يحط النفيش بجيس وبدال مايقطون وصخهم بهالجيس يقومون يلوتونه ويدعسونه بمكان البيبسي..
انزين عندك جيس قط اوصخك فيه لأ لازم الوصخ ينقط تحتهم..
تعودوا صار منظر عادي تعودنا عليه
من اتحاجي الله يهداك عمك اصمخ
شعب الكويت شعب وسخ
هذا الكلام اللي بينقال عن اهل الكويت اذا احد اجنبي شاف هالغيلة والوصخ بالسينما
ما نقول الا الله يهديهم
تحياتي
إرسال تعليق