كلامي اليوم عن المدونات البرايفت أو الخاصة
شسالفتكم انتوا !!!؟؟؟
يعني بعد ما تأسسون قاعدة جماهيرية ونستانس معاكم تسكرون علينا مدونتكم ( شهالقطاعة ؟)
يعني تبون تشوفون غلاتكم عندنا ؟
والا تغلون علينا ؟
ادري في ناس ما تستحي وقليلة أدب تهاجمكم بردودها بس ياخي ويا اختي اكو اختراع اسمه تحرير الردود ،، شطبوا ردودهم وفكونا وفكوا الناس من شرهم
تحتاج مجابل ادري بس هذي ضريبة الشهرة يا جماعة
يعني وين نلقى مدونات سنعة هاليومين ،،، ترى قاعدين يقلون ،، ماادري شسالفتهم !!؟
اللي اعتزل واللي تقوقع على نفسه وعملها برايفت
أعطيكم مثال
كنت من متابعين مدونة الاخت "خروفة" ...... وللاسف اغلقتها علينا ( بغض النظر عن الاسباب ولكني خسرت مدونة ممتعة للمتابعة)
وكنت من متابعين مدونة "ليل ايلين" ايضا وللاسف أغلقها علينا
واليوم انصدمت بمدونة "حاكي عقالي" ايضا اغلقها ,,, (يا رجل بلغنا على الاقل)
وانا بيني وبينكم ماارضى بهالاسلوب
ترى محد شافني وانا معصب
خلوا بالكم مني يا انكم تفتحون مدوناتكم للجميع وتحطون شروط معينة للتعليق ( راضين فيها )
يا انكم تستضيفوني عندكم بدون قيد او شرط وترحبون فيني بغرفة الاستقبال :) ==> طرار ويتشرط ، بس ايضا عندي حق :)
.
.
تحياتي
هناك ٣٦ تعليقًا:
;/
احلى شي اني اول تعليق و لو ان مو نوعي
بس تعاديت من الي يتنافسون على اول تعليق
p:
جنه حلو الشعور؟
انزين، الي يسكر مدوّنته انا ما أأيد هالشي << ديروا بالكم ترى ما أأيد D:
لان الواحد يدوّن لينفع الاخرين ! و اذا صكرها يمنع الاخرين من الاستفادة :(
حاكي عقالي بعد !
ليش :(
شفيهم !!
العزيز ساخر
أحيان عزيزي يقفل المدون مدونته لاسباب التعديلات .. وأحيان أخرى يود مشاركة موضوع معين مع أشخاص معينون ومن ثم يلغي الإغلاق .. و أنا مثال على ذلك قمت بعمل هالشيء أكثر من مره ..
وغير هذا و ذاك اللي أغلق مدونته من دون رجعه فهذا له أسبابه الخاصة اللي تمنعه من النشر للعلن ..
دائما عزيزي حاول أن تلتمس العذر فلكل شخص أعذارة و أسبابه .. ونحن ندعوا لهم دائماً بالتوفيق ..
ودمتم بخير وسلام
هدييييي ماله داعي العصبية الله يهداك
خرعتني والله .. كافي انك بالدوام وبروحه يرفع الضغط بعد هالدور ترفع ضغطك زيادة!!!
دايما كنت اعدك مسالم وهادي وماتعصب بس اليوم صار العكس واثبتلنا هالشي بالصورة بعد هههههه
يبا اللي مايبيك خله وروح
مثل ماقالت عبلة بمقولتها الشهيرةعن عنتر "خله يروح الله لايرده عساه بهالحال وارده" هههههههههه
لا جد صج سالفة بايخة لاني انا كنت مثلك اتابع جم مدونة وتسكرت
تصدق حز بخاطري تصرف حاكي عقالي
:(
انا معاك 100% ليش هل برايفت و الاغلاق ما ادري
وانا من متابعين الاخ حاكي عقالي
الهدف من المدونه هو علنية الطرح و حرية التعليق بحدود الادب وبسلوب راقي سواءاً
نقد او مدح معرضة او تأييد
ومشكور على البوست اللي على الجرح
وعطني ولعه
شفت شلـــــــون
عقب ما نتولع فيهم يكسرون فينا
يبيلهم زفه
ما يصيـــــر..أذا أنزعجتو من أحد غسلو شراعه بس الله يخليكم لا توقفون
تصدق حتي انا تفاجأت ؟
خل اروح اشوف الريال علامه
بيرجعون
وين بروحون؟؟؟؟
اي والله اي والله
انا كنت بقلب برايفت بس هونت الحين :q
صورتك تخرع قلت لاينط علينا مو وقته :)
سالفه الردود الي ترفع الضغط ، تقدر بكل بساطه تعدل وتمسح نفس ماتفضلت او انك تخلي التعليق للبلوقزر فقط
ماحبيت الحركه بصراحه :(
عادي .. صيانة دورية:)
لا بوليد ما راح يحرمنا من دخول مدونته، بس الغايب حجته معاة :)
لوووول انا هاليومين قاعد افكر اتقوقع
لوووووووووول
يمعود كل من يغني على ليلاه
وااااااي يا كبرها عند الله عاجل نقز علي ؟؟؟
يا ولد الحلال الله يهدي النفوس ويرجعون
صح كلامك
ماله داعي يعني يقدرون يتحكمون بالردود على راحتهم
بس انت هد اعصابك :)
جنك يبت طاريي :)
في بلوقرز اكتشفو ان ناس يعرفونهم بحد ذاتهم
وزهقو من تعليقهم ونقدهم
لان البلوقر مايبي يحس باي قيود لما يكتب
وخروفه بالذات حطت تنويه انها بتخلي البلوق برايفت واللي يبي يتم من زواره يدزلها ايميله
اما عن ليل الين فمادري شالسبب مع ان البلوق عجيب
اي والله
صج صج لعوزونا مع هالبرايفت
كل ما اشتطينا معاهم اختفو
بس شتقول بعد ما نقدر نطق الاوادم على ايدهم غصب خلوه بوبلك
الله كريم .. بس الي عنده نيه خل يعيد التفكير
p;
مرحلــه وتعــدي :)
حاكي عقالي صدمني :\
اهلين مي
الساعة المباركة افتتاحك لردود بوستي
عسى حضورك دوم باذن الله
شكرا لتأييدك لرأيي
تحياتي
اهلين مناير
شدعوة تعديلات فنية لا يكون جووجل واحنا ما ندري .. مااقتنعت صراحة
اما بخصوص مشاركة بعض الاشخاص موضوع معين ،، ليش ما يدقون على بعض بالتلفون ويفكونا
==> اوووخ طلعتي منهم ،، عيل عادي يصير مو مشكلة :)
على فكرة اخت مناير ترى اكو ناس عندهم جماهير صامتة ( شنو ذنبهم هذول )
أما اذا الشخص عنده عذر قهري
مو مشكلة ، بس ايضا احنا موجودين
ونوقف معاه في الحلوة والمرة ( الا اذا كان موضوع شخصي بحت )
تحياتي
أهلين 007
انا مهدي بس من معزتهم المدونية خلوني اكتب هالموضوع ==> حلوة المعزة المدونية :)
امانظرية اللي ما يبيني ما أبيه
اذا تم تفسيرها بشكل شخصي فهي مشكلة واقدر اطبق كلامك ولكن اذا كان الموضوع عام فالحل الوحيد هو توضيح وجهة نظرنا عبر موضوع
شكرا للتأييد
تحياتي
اهلين ابو الدستور
جزاه الله خير الاخ خالد "حاكي عقالي"
دزلي رسالة يوضحلي وجهة نظره بس مازالت المفاوضات جارية حتى الآن
تحياتي
العزيز ساخر
صباح الخير
ايه ليش ما يكون في تعديلات !!! يعني يبي يعدل بالمدونه يبي يغيرها يضيف عليها و ياخذ راحته ...
واللي يسكر مدونته اكيد عندة اسباب شخصية بحته :)
دمت بخير وسلام
اهلين boss
بوست على الجرح وعليه شوية ملح بعد :)
تحياتي
اهلين nanonano
شكرا لتأييدك لوجهة نظري
تحياتي
اهلين مشاري
اي والله حاول تلف راسه
انت من صوب وانا من صوب
تحياتي
اهلين عـــاجل
اي والله وين بيروحون منا
احنا وراهم وراهم :)
تحياتي
اهلين معاذ
إحمد ربك ان ما نقلت برايفت كان علمتك شسوي فيه ==> طيح الميانة وايد
وخلي بالك تراها خطوة ماهي بمصلحتك
ومثل ما تفضلت الردود الغلط نقدر نحتويها بخاصية تعديل الردود او وضع شروط الامن والسلامة عليهم
تحياتي
اهلين بلوق عمتي
الله يسهل على بوليد
شكرا لمرورك
تحياتي
اهلين ديكاتي
احمد ربك انك ما تقوقعت لأني جاهزلك مثل ما انت شايف بالصورة
اياني واياك تفكر مرة ثانية
تحياتي
اهلين هذيان
اي والله
الله يهدي النفوس قول امين
تحياتي
اهلين ملاك
شكرا لتأييدك لوجهة تظري
وخلاص تراني هديت :):):)
تحياتي
:)
:)
:)
اهلين قوقعة
ما نييب طارييك الا بالخير :)
تحياتي
اهلين سنعة
الظاهر فاتني تبرير خروفة
يا ريت تبلغينها برغبتي بالانضمام الى قائمتها لأني مااعرف ايملها اصلا
اذا المدون لا يرغب في كشف شخصيته وانكشفت فهذي قصة ثانية وما عليه الا ان يبدأ بتأسيس مدونة جديدة حتى لا ينقطع عن العالم لأن بموضوع البرايفت يعتبر نوعا ما معزول
تحياتي
أهلين Ghadoor
عليهم باعادة التفكير 100 مرة بعد :)
شكرا لتأييدك وجهة نظري
تحياتي
أهلين بنت الكويت
نتمنى ان تعدي على خير
تحياتي
اهلين مناير مرة ثانية
اذا في امور فنية ينزل المدون بوست ويبلغ الجميع بانه سوف يغلق من الفترة الفلانية الى الفترة الفلانية احتراما لمتابعينه
واعتباره اتيكيت المدونين
اما اللي يسكر مدونته فَعَلا قولتك
الله يسهل عليه
مع اني ما زلت معارض هههههخخ
تحياتي
إرسال تعليق