بوســــت مكســــــر

بما ان الجميع صار يتكلم بالسياسة
فعناد ماني متكلم بالسياسة .... ولسبب بسيط جدا

فالغلطان واضح
و الغبي واضح
واللي مسوي نفسه مو عارف واضح
والحرامي واضح
والطائفيين واضحين
واللي قاعدين يلعبون في حسبة البلد واضحين
والكل عارف كل شئ بهالديرة
فليش عوار القلب
مالنا غير الدعاء لهداية هالاشكال الغلط على الخير ويحطون خوفهم من رب العالمين بين عيونهم

المهــــــــــم
خلونا نعطيكم موضوع اجتماعي "وهو ميولي هاليومين مثل ما حضراتكوا ملاحظين

شرايكم بهالصور ؟؟!! ....... حلوين صح ... أدري لأنهم من تصويري (الثقة بالنفس عجيبة )

وقت تصويري لهذه الصور كان جونا حلو وباااارد وهو في بداية الاسبوع الماضي وهو عكس ما نراه اليوم من جو مرطب حبتين بس الحمد لله على كل حال ... عموما
لاتغركم هالصور الجميلة لأن اللي بتشوفونه تحت يثبت أن أكو ناس ما يعرفون شئ اسمه نظافة والمشكلة انهم عارفين المثل القائل "ان النظافة من الايمان" ولكن لاحياة لمن تنادي والدليل هو كالتالي :

خوذة ماادري كبوس خاص بأعمال البناء

شيايبه شاطئ البحر ؟؟؟ ....... ماادري صراحة ؟؟

من كثر اللخبطة ماادري شنو بالصورة هل هو حصم بحري ام مغاطي وكاكاو بحري

اللي مو شايف شئ لا يعور عيونه لأن الموضوع ما يسوى الا همتكم معاي في وقف هذا التلوث البحري بعدم رمي اي ش في البحر أو على الشاطئ

جماعة متفرغين طايحينله حَب بالكويتي و بزر بالسوري وفسفس بالسعودي :)

طيب ارموا وسخكم بالزبالة او بكيس ثاني .........

لالالالا

الارض افضل حل :(

حتى ماكدونالدز ما سلم منهم

وماخفي كان أعظم لأني طفت الاماكن اللي فيها اوساخ ورحت الى انظف منطقة شفتها على البحر

بس وبكل صراحة ....... كم واحد فيكم شاف ذيج السيارة الفخمة وفيها ذاك الريال السكبة أو ذيج البنت اللي حاطه مكياج يكفي بلد وكأنها رايحه عرس وفرغوا كلينكس ووصخ سيارتهم كله على الارض
أو ... ذاك اللي يمشي جدامك وحاذف عليك عقب سيجارته
ابصملكم بالعشرة إن كانوا برة الكويت وفي دولة غربية كان شفتوهم شلون احترموا القانون
بس الخمال من منوا يا ترى ؟؟؟

الا تعالوا ==> كسرة رقم 1

ساندويتش الـ " Turkey " في كوستا تدرون كم سعره ؟؟؟

1.950 د.ك شفتو الافترا ............

قلت يمكن انا مو عايش بالدنيا وموعارف نسبة التضخم اللي صايرة
بس لما رحت مركز سلطان لقيت صحن صغنن وفيه قطعتين كرواسون كل وحدة اكبر من الثانية محشوين " Turkey" وشغلات حلوة وطعمها حده عجيب ولذيذ تقولون بجم يا ترى ؟؟؟؟ بـ 950 فلس

==> كسرة رقم 2

منو يحب الرقي ؟؟؟

هممممممم طيب منو يحب الفن ؟؟؟

تدرون شلون
هذي هدية لمن يحب الرقي ويحب الفن 2 في 1

وللعلم صورت الصورة في الكويت :)

==> كسرة رقم 3
أكو محل عصير جديد داخل جمعية مشرف موقعه قرب مخرج الجمعية شكله لطيف وديكوره أجمل / إذا احد جربه يعطينا رأيه الكريم ..........

==> كسرة رقم 4

قبل يومين طلعت طلعة جميلة شفت فيها ماي وايد

وشربت فيها ماي وايد اشكر صاحب الفكرة شكرا جزيلا ...... اليايات أكثر باذن الله واهديك الوردة اللي بالصورة أدناه :)

تحياتي