الجمعة، ١٠ أكتوبر ٢٠٠٨

رئيس وأعضاء مجلس ادارة جمعية مشرف التعاونية

جمعية مشرف التعاونية


من روادها من ايام ما كانت (تشـ)ـبرة ( حظيرة ان صح التعبير )



وتطوعت فيها ايام الازمة عالخفيف



وتطوعت فيها بعد الازمة عالثقيل



واشتغلت معاهم في بعض المشاريع الاجتماعية



وتطوعت فيها ايام تحرير العراق من صدام



وتعرفت على اكثر من مجلس ادارة وكان تعاملهم دايما يمتاز بالرقي وحسن الاخلاق



ومستمرين الى وقتنا الحالي الى ان زادت الملاحظات السلبية والايجابية



الايجابيات صارت جمعيتنا قسم تابع لمحلات الشايع ،،صارت الافينيو جونيور

مايحتاي اروح اي مجمع كل شئ عندنا ولله الحمد والمنة



السلبيات ارتفاع اسعار بضاعة الجمعية ،،، وعذرهم الدايم ان الارتفاع مو من الجمعية الارتفاع من الموردين

واذا رحنا مركز سلطان او كارفور نلاقيهم كاسرين بسعر الجمعية بالارض ,,,لا وازيدكم من الشعر بيت يعطونكم هدية مجانية بعد

،، بس مو هذا محور حديثي


الشاهد من كلامي اني كنت ولازلت متابع لكل اصداراتهم الصادرة باسمهم فكل ما ينزل اعلان بتلاحظون انهم كاتبين في بداية او نهاية الاعلان جملة لازم يكررونها على كل شئ وهي جملة "رئيس واعضاء مجلس الادارة"



خو كتبوا مع تحيات جمعية مشرف التعاونية وانتهى الموضوع لالالالا........... لازم رئيس وأعضاء مجلس الادارة .. التواضع واصل حده يا جماعة





المهم شوفوا معاي اعلاناتهم الاخيرة بشهر رمضان والعيد



















عندي لكم اشياء اقوى بعد

اتمنى ان ترون المجلة الدورية التي تصدرها الجمعية واسمها "اشراقة مشرف" فكرة المجلة وايد حلوة وفيها كل اخبار المنطقة الاجتماعية تقريبا ولكن مع مجلس الادارة الاخير اصبحت كالتالي:
المجلة عدد صفحاتها 25 صفحة تقريبا يعني يـــالله يمديهم يحطون اخبار المنطقة






بس العدد الاخير شنو كان فيه يا ترى ؟؟
وجود 64 صورة لرئيس واعضاء مجلس الادارة تخيلوا 64 صورة فعلا شئ خيالي



صكوا على مجلة ليالينا خخخخخخخخخخخخ






في شهر رمضان اصدروا كتيب صغير فكرته حلوة وزعوه في جميع مساجد المنطقة اسمه "رمضان دروس وعبر"


تتوقعون بشنو مذيلين الصفحة الاولى من الكتيب ==> الجملة الشهيرة واللي ما يستغنون عنها أبدا "مع تحيات رئيس واعضاء مجلس الادارة"







يا جماعة الخير تراه كتاب دعوي ( حطوا شعار الجمعية عليه والكل بيعرف ان صادر منكم ) وجزاكم الله خيرا على هاللفتة الحلوة بس عنفقه وتشيحط مثل ما تسوون ما شفت .


اي صح الطامة الكبرى انكم بتلقون داخل نفس الكتيب وتحديدا الصفحة الثانية
اسماء جميع اعضاء مجلس الادارة من اكبرهم الى اصغرهم
الجماعة مو عارفين شلون يرزون نفسهم ،،، يا جماعة الخير تراه كتاب دعوي ،، تعرفون يعني شنو دعوي
يعني لوجه الله مو عشان ترزون اسمائكم فيه
الله يهديكم بس





وحتى لا يكون بالموضوع لبس او خطا
او موظف صغير يحاول يظبط مدرائه عشان ياخذ مكافأة مجزية
وصلنا صوتنا لمجلس الادارة بالتقليل من هذي الامور



تدرون شنو كان ردهم !!!!!






احنا نحط صورنا واسمائنا عشان الناس تصدق اننا سوينا هالمشاريع !!!!!!!!!

من صجكم هذا منطق ؟؟؟!!!

يعني اهل المنطقة اغبياء لهالدرجة وما يعرفون انكم سويتوا هالانشطة ؟

يا جماعة الخير ترى ما تقدرون تسوون اي نشاط الا بتواجد وتفاعل اهل المنطقة

والشغل الكل يشوفه ومحد يقدر ينكره ،،، فإذا كان زين الاغلبية بيمدحون ( رضاء الناس غاية لا تدرك )
اما اذا كن سئ فلازم ننبهكم عليه



بس فشخرة مثلهم ما شفت صراحة
بالنهاية التواضع حلو يا جماعة وتكفة " اتبعوا مقولة الرسول عليه الصلاة والسلام "

من تواضع لله رفعه ..

فالتواضع خلق حميد، وجوهر لطيف يستهوي القلوب

تحياتي

هناك ٣٨ تعليقًا:

BenTBonD يقول...

ماشااااء الله
كل هذا يطلع من جمعيتكم؟؟
والله هقيت اعضاءها من اللي خبري خبرك

الظاهر الحلوين يحبون الترزز ويترسون اساميهم بكل مكان وبينوون حق الناس ان احنا ترى اللي سوينا هذا واحنا اللي حطيناه
يعني ماله داعي تنشرون نفسكم بكل شغلة

وعدل كلامك من تواضع لله رفعه وياريت تقولهم هالحديث
لان حتى لو ماحطوا اساميهم او اعلنوا ان رئيس واعضاء الجمعية اهما اللي مسوين كل هذا الناس راح تدعيلهم بالغيب عن اللي يشوفونه اذا عجبهم الحاصل
ويمكن يسوون جذي عشان لي صارت انتخابات الجمعية الياية الناس تتذكر اسامي اللي عدلوا بالجمعية وتنتخبهم

انا ما اقول الا الله يهديهم ان شاء الله ويقللون من هالشي
وعليكم بالعافية بجمعيتكم الحلوة

وسؤااال جم كان عمرك يوم تتطوع فيها ايام الازمة؟؟؟ لايكون عمرك من عمر بوجسوم وانا مادري

enter-q8 يقول...

تبي الصج انا مستانس من جمعية مشرف على شغله وحده متى ما البيت قالولي نبي نروح السالمية حق مذركير و الا كذا و كذا
اوديهم مشرف و افتك
بس منيوم ماانقلوا افرعهم فوق بالطابق الثاني كرهت الجمعية شفت الاشكال اللي قاعده تقز عبالها الافنيوز صج
انا ذكرت هوشتي هناك
الصراحة يازين زحمة السالمية

الدســتور يقول...

شكلك قاعد لهم قعدة محترمة

ZooZ "3grbgr" يقول...

يقولك ياهم واحد سوى الستلايت فوق مبنى الجمعية جان يقولهم ابي الشيك قالوله على ما نوقعه روح الزق هالستيكر تحت الستلايت راح المصلح فوق وهو يتحلطم يقول يعني مأخريني علشان ستيكر المهم .. لزق الستيكر ولا يلقى مكتوب عليه

"مع تحيات رئيس واعضاء مجلس الادارة"

نور سلطان العيسى يقول...

الصراحة .. قريت البوست كم مرة ..

مب مصدقة .. إن حب الظهور والنفاق الاجتماعي وصل لهدرجة ..

الله يعينكم ..

هذا اللي يقول ::

شر البلية .. ما يضحك ..


بنت سيف

Kuwait يقول...

ما انتبهت حق هالشغله بالجمعيات ..
من اليوم وورايح ببدا أثبتها واعلمك اذا حتى جمعياتنا والا بس جمعيتكم :)

حسام بن ضرار يقول...

عاد شدعوه رئيس و اعضاء مجلس قيادة الثورة على ايام صدام!

الظاهر يعانون من جنون العظمه.

الله يعين لو صاروا اعضاء مجلس امه....

Unknown يقول...

أنا من رواد هالجمعية

وهم من لما كانت جبرة :)

ولكن الصانع من مسكها واهو الله يهديه مدوده

غير معرف يقول...

لدى جمعية مشرف التعاونية وديعة بمبلغ ثلاث ملايين دينار لدى بيت التمويل الكويتي !

جمعية الفساد الأجتماعي ساندوا على فوز معظم أعضاء مجلس الأدارة الحاليين ! وطبعا ما يخدم بخيل !

esTeKaNa يقول...

اربعه وستين صورة
لا اله الا الله
عاد عسى مزايين؟
:Pp~

غير معرف يقول...

العزيز ساخر

فضحتنا الله يهداك هذا ماكان اتفاقنا اهل مشرف نحل مشاكلنا بينا وبين بعض ما ندخل الغرب .. الحين زين لك شمت العذال فينا ..

وين أروح الحين انا:P

عاد مشرف هذي العز .. بيتي وبيتك :)

تصدق عاد المجله كله بالمطبخ :P

وبعدين شتبي بعد عندك سبا حق السيارة دلعها وانت نازل تتسوق :)

خلهم يستانسون يحطون صورهم واساميهم:)

وترى انا من زمان شاكه فيك تطلع ولد الجيران :)

وصج نسيت اقولك حاشتكم الحفريات والا بعد:p

دمتم بخير وسلام

أبو لطيف يقول...

المهم

اهم خوش اوادم او لا ؟

mo3ath يقول...

ياموعد إذا قاعدين يشتغلون ويت السالفه على اساميهم انا راضي

مو احسن من الي يبوقون عينك عينك ومايعرف شنو شغله مجلس الإدراه

ماغير حرمنه مالها والي ويعرفونك وقت الانتخابات مادري على شنو :/

بالعافيه عليكم احسن من الي عندنا :)

Ducati يقول...

لووول يالله زين الظاهر مو مصدقين عمرهم انهم اعضاء مجلس اداره

:)

. . . ساخر كويتي يقول...

اهلين شمحوطة
هي كلها اسباب انتخابية أولا واخيرا

وكالعادة لازم عندج ضغطة صغيرة
بالنسبة الى عمري
ما خشيته عن احد
دخلي على البروفايل الخاص فيني وبتلاقين كم عمري وعليج الحساب الى تاريخ الغزو

مو كل شئ نلقمكم ياه باردة مبردة
لازم تحريك المخ شوي احم احم

تحياتي

. . . ساخر كويتي يقول...

اهلين بوليد

على فكرة تقدر تدخل الجمعية وخصوصا المول من المواقف اللي فوق
عشان ما تحوس بشغل الجمعية

بس زحمة عن زحمة تفرق خخخخخوالاشكال الغلط لها وقتها والاشكال السنعة لها وقتها وعليك الحساب

تحياتي

. . . ساخر كويتي يقول...

اهلين ابوالدستور

قعدة فيها النقد الايجابي باذن الله
تحياتي

. . . ساخر كويتي يقول...

اهلين ZooZ "3grbgr"

نسيت اقول انهم وزعوا على ديوانيتنا تمر شغل عدل بمناسبة رمضان

حزري فزري شنو كان مكتوب عليها
هههههه

الله المستعان
تحياتي

. . . ساخر كويتي يقول...

اهلين في بنت السيف

طبعا هم يهونون عن غيرهم
بس هالنقطة كانت محسوبة عليهم
وحبنا فيهم يتطلب ان نبرز لهم عيوبهم

لتقويمها
تحياتي

. . . ساخر كويتي يقول...

اهلين بنت الكويت

بانتظار ملفك التجسسي هههه

تحياتي

. . . ساخر كويتي يقول...

اهلين حسام

هههههههههه الظاهر هذا الشعور من مخلفات الغزو ايضا

تحياتي

. . . ساخر كويتي يقول...

حيالله رواد جمعيتنا
هلا مشاري

الله يهديه على الخير قول امين

تحياتي

. . . ساخر كويتي يقول...

الاخ اللي بدون اسم

ما نقول غير الله يهديهم

تحياتي

. . . ساخر كويتي يقول...

اهلين استكانة

هههههههههههههههه
حلوة منك

من كثر التكرار وقلة الصفحات حتى ويوههم ماهي واضحة

تلاقين الصفحة فيها 5 او 6 صور يحتاجون زوم عشان توشفين ويه واحد منهم

تحياتي

. . . ساخر كويتي يقول...

اهلين مناير
هههههههههههه
هههههههههه بالعكس سويت دعاية حلوة لرئيس واعضاء مجلس الادارة لجميعة مشرف التعاونية خخخخ ... الله يعين على الزحمة اللي بتزيد

اي صح السبا جم اسعاره ودي اودي سيارتي هاليومين ...

ومثل ما تفضلتِ فمنطقة مشرف من المناطق الراقية جدا في الكويت ما اقول هالكلام لأني من سكانها ولكن هذا هو الواقع صراحة

بس وبالنهاية من تواضع لله رفعه يا مناير

بالنسبة الى الحفريات ( سؤالك استراتيجي )فهم واصلين على حدود بيتنا والله يعينا على الحوسة

تحياتي

. . . ساخر كويتي يقول...

اهلين بولطيف

طبعا خوش اوادم
ورغبتي الاساسبة من هذا البوست هو نقدهم نقد بناء باذن الله
وعلى الله يستفيدون

تحياتي

. . . ساخر كويتي يقول...

اهلين معاذ

في جمعيات الله يعين اهلهم عليها
فعلا مثل ما تفضلت
يعني مقارنة بما يحصل حوالينا
بما نقول غير الحمد لله على كل حال

شكرا ماي فريند

. . . ساخر كويتي يقول...

اهلين دوكاتي

فاقدك هاليومين في مدونتي
فعلا مومصدقين صايرين اعضاء
واذا شفت صورهم بتعرف شنو اقصد ههههههه

تحياتي

BenTBonD يقول...

ساخر يعني كنت كتكوت دام ان عمرك كان 11 سنة بس والله كان شكلك ريال وانت بهالعمر دام انك داش الجمعية

غير معرف يقول...

العزيز ساخر

مو قلنا لكم لا تتكلمون .. الحين شيفكنا من الزحمة .. بروحنا مو مترقعين:)

السبا الله يسلمك اسعارهم من 3 الى 11 د.ك :)

اذكر نظفوها من داخل وغسلوها من بره ولمعولي الرنج ب 4 دنانير:)

وبعدين ضروري راقيه مو احنا فيها:)


دمتم بخير وسلام

. . . ساخر كويتي يقول...

شمحوطة
تقولين كان شكلك ==> شنو يعني شفتيني ؟؟
وين ومتى وشحقة و ليشششش ؟؟؟

كنت ديج ( ديك ) وانتِ الصاجة
تحياتي

. . . ساخر كويتي يقول...

اهلين مناير
واضح ان اسعارهم زينة وتنافسية

الزحمة موجودة باعلان وبدون اعلان ماكو فكة .. بيني وبينك
احسن أحسن عشان تزيد ارباحنا السنوية خخخخخخ ==> تفكير استراتيجي

وصح لسانك منورة بوجودنا ووجود الزوار ايضا ==> مانبي نزعلهم :)

بنت الشاميه يقول...

اجمل شيئ انك حطيت الايجابيات
ثم السلبيات....وهذا من اهم اساسيات النقد البناء
ما قصرت

حسبالهم الجمعية جمعيتهم بروحهم.....ينسون انفسهم اذا اقعدوا على الكراسي ...مشكلة ما يدرون ان
دوام الحال من المحال
يعطيك العافيه

BenTBonD يقول...

هههههههه السموحة ساخر لا تزعل
انا قصدي يعني احس انك بذاك العمر كنت اكبر من سنك
يعني ريال وتعتمد على نفسك

JiBLa CiTY يقول...

ياحلو سوق لندن
:)

. . . ساخر كويتي يقول...

اهلين في بنت الشامية
حياج الله

لازم نذكر الشغلتين واذا تلاحظين ومن خلال ردودي بتلاقين ايجابيات اكثر بعد

بس هدفنا من البوست توضيح سلبياتهم
ليتلافوها
ودوام الحال من المحال فعلا
صح لسانك
تحياتي

. . . ساخر كويتي يقول...

شمحوطة
ولو ما زغلت بس كان ودي اردلك الضغطة اللي في البوست اللي طاف هههههاي

وشكرا على الكلام الطيب
جزاكي الله خيرا

تحياتي

. . . ساخر كويتي يقول...

اهلين جبلة سيتي
ياحلاة الميرة بعد خخخخخخ

خدعتني وعلى بالي سوق لندن بلندن
بس مو انا اللي تقص علي ههههههه

تحياتي