تذكرون برتقالة الخيران اللي يبيعون فيها عصير
قريت في احدى المدونات انهم شالوها
ولكن البارحة كنت زاير الخيران لقيتهم معدلين البرتقالة الى كشك مكعب
الخيران وما ادراك ما الخيران
سابقا كان مكان جميل جدا وفيه ذكريات حلوة كثيرة لأنه كان فكرة جديدة وحلوة
أما الآن ما اقول غير الله يرحم ايام قبل بسبب عدم التطوير والاهمال
فالاهمال قد ضرب باعصاره على هذا المنتزه
كل شئ على حطته ، يمكن الشئ الوحيد اللي اضافوه مجموعة من الفلل الــ VIP ( لانقاذ ماء الوجه )
الالعاب نفسها القواري نفسهم الشوارع نفسهم
اللهم الا انهم عدلوا مسارات السيارات وصار المنتزه كله One side وألغو فكرة رايح راد ( بيني وبينكم احسن وذلك تقليلا من لازدحام ) الملاعب نفسها ماعدا كم ملعب سلة وطائرة مهجورين
يعني ماادري شلون يفكرون!!! المساحات الفاضية شكبرها ولايدرون عنها
تكفة سوو سينما سوو العاب جديدة ،،، طوروا المكان تلحلحوا ،،، بكرة مدينة الخيران ولاجون سيتي بيفتحون يمكم بعد والناس بتنساكم ولااحد بيقرب منكم الا النطيحة والمتردية من الناس
قاعد اتكلم وخايف ان هالاشكال بتروح
الا راحت وانتى الامر الله لا يوريكم الناس من بنات وشباب
اخلاق عجيبة
وبما اننا نتمشى في القواري الرباعية بين الناس ونسمع سوالفهم
ما طفت على احد والا وقط كلمة وصخة (احتراما للمدونة وروادها لن اكتب ماسمعت )كبار صغار بنات شباب
اللسان القذر صاير موضة الظاهر
شئ يخجل
ولا كاننا طالعين من شهر فضيل والناس عودت نفسها تتكلم باسلوب يتناسب مع هذا الشهر
ولا كاننا مسلمين الاسلام نهانا عن البذائة باللسان
الجماعة عمك اصمخ
الله يهديهم
_________
صيد كاميرة التلفون
_________
الا في احد منكم شاف ATM بيت التمويل المتحركة مسمينها ( موبي بيتك )
ذاك اليوم كان عندي مراجعة عندهم وشفتها واقفة عند المقر الرئيسي بالصفاة
شكلها عجبني قلت اشارككم شكلها
في رمضان كان في برنامج مسابقات اسمه بنك ديل
تقديم واحد ولد القطان ،،،، شفت دعايته على احد الباصات
بس مسكين شمسنا الحنانية خلت نواف ياخذ تان محترم هههههههههههههه
الا تعالوا سامعين عن مستشفى بالكويت اسمها مستشفى الامومة ؟؟؟!؟!؟
ضغطوا على الصورة وبتلقون الاسم واضح عليها
واخيرا
لا تنسون صيام الست أيام من شوال
نسأل الله لنا ولكم الاجر
تحياتي
هناك ٣٨ تعليقًا:
بييييييييه شخباري الخيران
اخر مرة طبيته على اول ايام التسعينات يوم كنت ياهل .. بس كنت اشوفه من بعيد لي مرينه عليه بالطراد
اما هالشاليهات اليدد اللي مسوينهم جدام شاليهاتنا خربوا علينا الماية حسبي يالله على ابليسهم
وصدقني الخيران بتم مثل ما اهوا ماراح يتغير كلش
والحين لا تستغرب، مايكون الصبي والبنت عيال ناس اذا ماسبوا وصار السانهم وصخ لان صارت موضة واشكره جدامك يسبون وماكو حشيمة حق اللي حوالينهم
ازيد من ذاك اليوم بالسوق قبل العيد واحد جدامي قاعد يمشي وانا وراه ما اشوف الا سوا حركة بأصابعه حق رفيجه
انا طقني عقر بقر فجيت عيوني قلت انا بحلم ولا بعلم!!!!! والله ماصدقت اللي شفته.. الله يهديهم ان شاء الله ويصلح بالهم
الموبي بيتك الصراحة اول مرة اشوفها ما مرت علي من قبل وبرنامج القطان الصراحة مايعجبني حده لوعة بس صج مسكين حاكته الشمس عدل
على طاري المستشفى والله حسبتك ماخذ الصورة بالسعودية مو بالكويت
اول مرة اشوفه واسمع فييييه
تكفة وين صاير ؟؟ خل اسويله دعاية حق اي احد بيولد هههههه
والسمووحة لاني تكلمت اكثر منك هههه
اول شى يزاك الله خير على التذكير بصيام الست
ثاني شى السيارات هذى مالت السحب الالي خدمة قدمتها البنوك اولها برقان وبعدين الخليج والحين التجاري واخيرا التمويل
ثالثا الخيران وجميع مرافق الكويت مع الاسف الشديد تتحول الى شوية مزابل في العيد
تحياتى لجولتك الجميلة:)
قلتها انت سابقا سابقا
الخيران
طالما المنتزه شغال ويطلعون فلوس ... عمره ما يتغير
شعارهم ... قديمك نديمك
وعسى الله يهدي اعيالنا ويهدينا وياهم
المستشفى ... خاص ؟
جزاك الله خير
الخيران ولا مره بعمري دشيته و احس احسن لي ما اسمع عنه الا الوصاخة :))
اهم شي التان :))
مستشفى الأمومة!! وين هذا؟
وبعدين الخيران دام الحجوزات دايم فل ما راح يغيرون مغز ابرة
تظن هامهم من بيفتح يمهم
ولا من قواة العين يعلنون عن المشروعات السياحية بالعيد ههههههه
وبعدين انا معاك لسان وايد ناس صاير لا يحتمل
أكثر شي أكرهه السب لا وعيني عينك
الله يهدي الجميع
مادري ليش ما يهتمون بمنتزه الخيران و اهوه الواجهه الجنوبية للبلد
الله يعلن البخل
والله عدل كلامك
!!
كل سنه لنا روحة الخيران نحجز عشرين شاليه تقريبا
اخر مرة اقول حق اهلي احس كل ما ييت الخيران ان هذا اهو ولا تغير ولا جنه مرت سنين احس ماكو شي يتغير الا أنا اللي قاعده اكبر
:(
ويزاك الله خير على التذكير بصيام الست
:)
شخبارررررررررري الخيران مايتعلمون من دبي الحمدلله والشكر :)
لوووووووووووووووول اما المستشفى ترى للحين مافتح وهو بالرقعي جدام دوامي بالضبط ;q
وحدوووووووووه
وترى مستشفى الامومة خاص و موقعه بالرقعي
وعطني ولعه
القواري ليلحين ياخذون تأمين عشرين؟
قبل كنت أتسلف من الياهال كلهم عشان أحصل العشرين، لوول
على كلامك عادي إذا رحتله ما تغير شي علي إلا برتقالتهم، والله عيب
واحد من الربع تصدق نسخة من نواف القطان!
إبتلش بالمُعجبات إمسيكين، يمشي ويخزونه. جان زين نواف صج صاير اسود عشان يفرقون بينهم
لول
الخيران من عمر ماحطوا فيها مسمار يديد
بس الشاليهات اليدد حلوه وقعدتها احلى اسألني :)
مكينه بيت التمويل مو اول وحده ، بنك برقان سابقهم بمليون سنه وحاط وحده بمصافط الكون صارلها دهر ملوعه جبدي :q
أهلين شمحوطة
هالسنة حاولنا نوصل رسالة التطوير في المنتزه الى المسؤولين ،، وعلى الله يثمر بنتيجة
حتى السب صار هبه ،،، لاحول ولاقوة الابالله.... الحمد لله اني مو من ربع الهبات
مستشفى الامومة صاير بالرقعي مقابل منطقة الجي ون ( G1 ) بالقرب من مجمع المحاكم وفندق سفير الرقعي
حياج الله
وعيدكم مبارك
أهلين مشاري
حياك الله
بالنسبة الى خدمة السحب المتنقلة خبري في بنك برقان بس اما البقية مشكور على تنويري فيهم :)
مرافق الكويت الحكومية مشكلتها الازلية الصيانة
انطر بكرة يسلمون الافينيو الحكومة
وبتروح عليه ويصير زبالة ايضا خخخخ
تحياتي لك مشاري
اهلين خالد
اي والله كل شئ صار سابقا
الكويت بكبرها صارت سابقا
الله يهدي الجميع
ويجعلهم بفكرون بالكويت قبل اي مصلحة اخرى
تحياتي
أهلين بولطيف
مو هذي المشكلة ربعنا من قلة الاماكن
وكثرة الطلب عليهم في مواسم الاعياد
تلقاهم ما يطورورن
بس شاطرين يطورون مكتب الاستقبال ( تدري لأنهم هم اللي قاعدين فيه )
بالنسبة الى المستشفى فهو خاص اي نعم
تحياتي
وحياك الله
أهلين عبادي
قوي التان هاااااا !!! هههههههه
حياك الله
تحياتي
اهلين بوزوز
مستشفى الامومة موجود في الرقعي مقابل منطقة الجي ون بمصاف مجمع المحاكم
لسان الناس يبيله قص بموس مو بمقص
اي والله يهدي الجميع
تحياتي
اهلين حسام بن ضرار
اهو عندنا احنا واجهة عليها القيمة
كل شغلنا ترقيع
الله يرحم ايام قبل كل شئ جديد
الحين لا جديد ولا حتى القديم صار يسوى تروحله
البخل على الناس اما على نفسهم
فمواصفات حاتم الطائي كلها تنطبق عليهم
تحياتي
أهلين استكانة
ماشاء الله تبارك الرحمن اليمعة تصير حلوة اذا كل الاهل رايحين
بالنسبة الى التغيير اصدقك القول بجملة "ماكو شي يتغير الا أنا اللي قاعده اكبر"
تدرين ليش ماكو تطوير
لأن محد من المسؤولين يروح هناك
ويطلب منهم التغيير كل مسؤول عنده شاليه بروحه والشعب يدبرون نفسهم
حتى اللي عنده شاليه يحب التغيير بشوفة الناس وكسر الروتين
حياج الله استكانة
وعساج من عواده
أهلين بنت الكويت
عجزنا واحنا نقول تعلموا من دبي
ودايما ردهم يقول ان دبي فقاعة
هههههههههه عيل احنا شنو
يعني شغلنا الصح الحين واهما الغلط
خلونا ساكتين يا حكومة لا نحرجكم بس
بالنسبة الى مستشفى الامومة شكرا على التوضيح بانه لم يتم افتتاحه بعد
شكرا يا مراسلتنا وبانتظار خبر افتتاحه
هنــــــا الكويت
:) تحياتي
اهلين boss
شكرا على تنويرنا بالمكان والاسم
وتفضل ولعه ،،،واخيرا بعد شهر رمضان ولعناها لك خخخخ
تحياتي
Boss
بما انك قلت وحدوووه
نسيت اقول لا اله الله محمدا رسول الله
وجزاك الله خيرا
اهلين mate
فعلا القواري الرباعية الى الحين بعشرين
ذكرتني بياهل جدامي قاعد يكاسر الموظف بسعر التأمين خخخخخخخخ يقوله بعشرة الموظف يقوله مايصحش
انزين بخمستعش
برضوا مايصحش ههههههههه
وسلملي على شبيه نواف القطان :)
تحياتي
اهلين معاذ
فعلا الفلل الجديدة قعدتها حلوة
وفرق السعر بينها وبين العادية 200 د.ك تقريبا
بالنسبة الى مكينة الـ ATM المتنقلة
كان قصدي اني اول مرة اشوف وحدة خاصة في بيت التمويل
شرايك نروح بالليل ونلون مكينة برقان لون احمر يعني بنك بوبيان سطى عليها خخخخخ
تحياتي
اخوي العزيز الاسئلة اللي طرحتها انت انا سبق وان قلتها لأحد مسؤولين الشركة كان موجود عندنا بالديوانية
وانصدمت ان هناك مشاريع ضخمة ودراسات مقدمة من أعرق الشركات
ومنها شركة هولندية لتطوير الخيران
وللاسف هذه المشاريع واقفة في مجلس الوزراء
للعلم فقط
هذا سيفوه وهذي خراجينه
تصدق كل ما اروح الخيران عبالي امس اول اولت امس رايح كله كلش مايتغير فيه دائما كل سن نحجز تقريبا 8 شاليهات اهوه احلى مافيه حق البحر وجمعة الاهل وتصدق قبل كان شكثر تصير حوادث بالخيران من السياير ذيك السنه من اول يوم توني واصل الخيران ماصار لنا 4 ساعات فتريت بالقاري وله اشوف بو 15 و 14 سنه بيدهم السياره جان على طول اطير عند الامن و قلت لهم في يهال يسقون سياره و مني مو مكان سياقة يهال ولا تراي جان يقول حق صاحبه اي اي صايره موضه الله خير كل شي موضه بالكويت وهالساحه الترابيه الخايسه الي بالنص خو حطو فيها بحيرات و كافيهات انترنت و سينمات
وعادي لاتستغرب مناك بالقز الي يصير والكلام البايخ يهال متعلمين هالكلام خووش ياهل
والبرتقاله القديمه شكلها احلى من قبل سنتين مادري ليش غيروا شكلها ولي الحين يسمونها برتقاله
والشاليهات حلووه مسوينها نظام اوربي
اكره الخيران
من صج اكرهه
احس اذا البنت تبي تتهزأ خل تتمشى طول الوقت فيه
مرات انجبر اروح لان كل اهلي هناك
بس انا احب منتزه خليفه اكثر احسه عائلي
الخيران نفسه على حطته
ومثل ما انت قلت مساحات فاضيه عالفاضي!
على كثر اللي يدخلونه مو مفكرين يطورونه الله يهديهم بس ..تصدق أنا كنت رايحة له قبل الغزو وعقب سنين حجزنا ورحنا السنه اللي فاتت واللي قبلها ما شفت عود تغير ولا شي على حطت إيدك استغربت زيدوا المطاعم طوروا حمامات السباحة صوب البحر غيروا يقدرون بسما يبون جذي جذي النا بتييهم ...
وإذا على قلة الحيا شكثرهم اللي ما يحترمون أهلهم شلون تبوهم مع ربعهم دنيا قول عليها السلام ...و عسى الله يهديهم ..
وأنا ولا مرة شفت هالسيارات ..
وبرنامج بنك ديل ما علامه شي زوين ونواف يقلد ميشو :)..بحركاته..
الست البيض من شوال؟؟
أنا خبري الايام البيض 13 14 15
جزاك الله خير على التذكير بس أيام الستة من شوال لا تسمى البيض
:)
من وين يايب صورة البرتقاله
اه يالخيران
صج للحين الاوادم يركبون قواري ويشغلون الاغنيه على الاخر
؟؟؟
عيدك مبارك
ياهلا فيك اخوي ابو الدستور
صراحة فرحتني بكلامك
ولكن هل من المعقول ان يتدخل مجلس الوزراء
في موضوع الخيران
الا اذا كان في الموضوع مناقصات واقرار لميزانية غير اعتيادية
فالله يعيننا على التنفيع
أما اذا ما قسموها صح
الله يعين على الدس بالادراج
تحياتي
اهلين كويت ماستر
عجبتني فكرة البحيرة
شنو بيكون عليها طق
المخالفات خذ وخل الشرطة قاعدين برة على الطل ولا يدرون شنو قاعد يصير من مخالفات وتجاوزات داخل المنتزه
الله يهدي الجميع
تحياتي
أهلين بالسنعة
انتِ قلتيها :
""مرات انجبر اروح لان كل اهلي هناك""
وهذا اللي جبرني انا بعد ههههههههه
فعلا مكان بايخ بسبب قلة التطوير اللي فيه
على الله يفكرون وينفذون اي خطة لتطوير بشكل جذري
تحياتي
أهلين وسهلين اخ Abwaby
مهما رجعت بالتاريخ ورحت للخيران الحين
بتلاقي تغيير طفيف جدا وغير جوهري بالمنتزه
بانتظار يحسون على دمهم ويعدلونه هههههههه
تحياتي
أهلين اخت Purplecious
شكرا وجزاكِ الله خيرا على التصحيح فالخطأ اللي وقعت فيه يقع فيه العديد من الناس
وبانتظار مشاركاتك الاخرى هنا في مدونتي المتواضعة
تحياتي
أهلين براك
صورة البرتقالة خذيتها من النت
بس بقية الصور من تلفوني النقال :)
وكل اللي قلته من عادات وتقاليد عبيطة في المنتزه مازال الناس يقومون فيها ،،، الله يشفيهم بس :)
تحياتي
فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية :
1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - الطاقة المتجددة كبديل للطاقة النووية. فالطاقة النووية لها محاذيرها وهذا ماسوف نشرحه بالتفصيل.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:
http://www.ouregypt.us/culture/main.html
إرسال تعليق