خميســـــــيات

مزاجي اليوم اسوي لكم ماكنتووووش خاص للويك اند


شوفوا معاي هالصورة


شنو قصدي فيها ...... مااسمع ...... احتاج صوت اعلى

لا غلط ما اقصد اللوحة الالكترونية اللي دفعوا فيها حاجة ومليون دنار ( مو دينار ) حتى ينفعون واحد ما يسوى مظبطله مسئول بالداخلية لأخذ هالمناقصة
ولما يشغلونها يسوونها دليل التلفزيون .. ويقولون حق الناس مواعيد برامج المرور بالاذاعة والتلفزيون ( والله فشلة )
بدل ما تكون لحل مشاكل المرور اللي موراضية تنتهي وإعلام الناس بما يحصل امامهم من حوادث وتوجيههم لطرق اخرى
انا اقصد من هالصورة :

جمال الغيوووم اللي من زمان ما شفناها وجمال هالجو العليل هالايام سبحان اللــــــــه تبارك الرحمن


اللهم أدم علينا هالجو الجميل يا رب العالمين وأنزل علينا صيبا نافعا يا رب العالمين





-------------------------------------------------------------


طيب مارايكم بالصورة اللي بعدهـــــــــا

مو تقولونلي انها عن جمال هالسحب وجمال هالجو ايضا

لالالا لالالالا لا لالالا


اطلب منكم يا جماعة تكبير الصورة

وبتلاحظون ان اكو هوليكوبتر تطير فوق الناس وقت الزحمة من صباح الله خير الاسبوع الماضي

طبعا وضعي المرور كان كالتالي : مجكر بالزحمة ولايعة جبدي والسير واقف ما يتحرك قيد انملة ==> حلوة انملة صح :)

وحارات الامان يمينا وشمالا تتمخطر فيهم سيارات شعبنا الكريم المبجل والمقيمين اللي شافو الارعة ترعى ايضا

تحديث ...

وجود الهوليكوبتر بط جبدي بسبب حرية تنقلهم بدون قيد او شرط

ورايحين وراجعين ووناسة أناسة .... والهواء فاضي وماكو سيارات تنغص عليك عيشتك خخخخ

--------------------------------------------------------------

انتقل لكم الى صورة فريش توني صايدها بدواعيس حولي

مقهى ومطعم شوفوا اشنو اسمه


المشيشاتي ==> تبون تشيشون حياكم الله هناك

تبون احد يشيشكم ايضا حياكم الله هناك

تبون تاخذون عضو مجلس امه تشيشونه على وزير او كائن من كان سحبوه من خشته وخله يتشيش :)




--------------------------------------------------------------



كل ما ارجع من الدوام أمر على مستوصف الخصوصي في منطقة النزهة ( على ما اعتقد )

مكتوب عليه ( كبروا الصورة إذا قدرتم .,.. لأنها مأخوذة على الخط السريع )

مركز شيخة حسن الابراهيم التخصصي

والدة محمد عبدالرحمن البحر

جزى الله خيرا صاحبة هالتبرع الكريم ... اللي بكل تأكيد فك ازمة بسبب خوارة بعض قطاعات ومستوصفات وزارة الصحة
وبما انه عمل خيري فرب العالمين هو من سوف يعطي الاجر على نية اصحاب العمل ( صح والا لأ يا جماعة الخير )

والمعروف بان أعمال الخير يفضل دائما ان تكون مجهولة
ومثل ما قال رب العالمين ان اردت ان تتصدق

طيب ليش حاطة اسم ولدها

فافضل صدقة هي ان لا تخبر بها أحد. .فمن المفترض ألا تعرف اليد اليمنى ماتنفق اليد اليسرى.



--------------------------------------------------------------



ذاك اليوم راجع على طريج الخليج العربي ( وللعلم من زمان ما رجعت عليه )
والا اشوف ان مستشفى الميدان ماشاء الله على وشك الانتهاء منه


طبعا طريقة بنيان المستشفى مقصود فيها ان يكون البنيان على شكل امرأة حامل ( لأن المستشفى بيكون متخصص بشكل كبير على الحمل والولادة ) بيني وبينك احسه يشبه برد العرب ايضا :)

والله يعيننا على فواتيرهم واسماء غرفهم الملكية والماسية والاستقبالات اللي لازم نشق المخباة لهم بسبب المبالغ الطائلة لهذه الغرف
يعني بوجهة نظري لو يحطون هالمبالغ بصندوق استثماري لعيالهم
او بمعاهد مفيدة ولتحفيظ القران كان وايد احسن من هالفسق )






.
.
.
تحياتي